Prender digl agen ed inscenar quei ch’ei dat

Dapi l’entschatta dalla primavera envidan Edi e Ramona Caduff, ensemen cul cuschinier Ursin Derungs, ell’ustria NUA. Leu spetgan da niev inscenaziuns culinaricas.

parter

L’ustria da Ramona ed Edi Caduff a Degen ha in niev num ed in niev cuschinier.Il num ei specials. Il local ell’anteriura stizun dil Volg, ha treis bustabs. Pils Romontschs eis ei in plaid ch’ei definibels claramein. Leu NUA ch’jeu mondel. Leu NUA ch’ei dat bunas tratgas, e quei buca mo capuns e maluns. NUA sa era esser ina damonda: Nua mein nus cursera a tscheina? Ramona ed Edi Caduff han encuretg gitg il dretg num da lur ustria restructurada. La finala ein els sedecidi pils treis bustabs. «Il num duei colligiar l’originalitad dil menaschi da bio culla creativitad dalla cuschina. El simbolisescha era il respect per la natira, sco era nossa filosofia da restar autentics», explichescha Ramona Caduff. Il NUA a Degen pudess daventar in’adressa per gourmets.

Cuschinar ei ina passiun

La purschida nova ei in cuntrast tier gl’usitau dil davos temps. «Il pli savens aud’ins en nossa vallada d’ustrias che siaran ni che mauncan», renda Edi Caduff attent. El e sia dunna meinan dapi onns il bein puril amiez il plaun da Degen. Sper la caplutta da sogn Bistgaun ei la stalla culla biestga ed ils animals manedels, dasperas il grond iert. Igl ei la basa dils products che vegnan ella cuschina dad Ursin Derungs. Cun el han Ramona ed Edi Caduff saviu gudignar ina persuna dil fatg. «Jeu cuschinel quei ch’il menaschi, siu iert e las stagiuns porschan», declara il cuschinier da 29 onns. El ei carschius si a Dardin, ha empriu ed ei seperfecziunaus en sia clamada. En discuors cun el s’encorsch’ins ch’il cuschinar ei buca mo professiun, mobein passiun. «Quei che Edi porta, vegn jeu a duvrar. Jeu hai grond plascher d’astgar esser creativs culs products indigens», sincerescha Ursin Derungs. Suenter gl’emprendissadi ha el luvrau en divers menaschis. Ussa selegra el d’esser libers e da saver applicar sia atgna creativitad e cumponer deletgs culinarics.

Negina carta da menu

L’ustria NUA ei in in menaschi pign e persunal amiez la Lumnezia. Ramona Caduff ei il ligiom denter bein puril e cuschina. Ella organisescha, pren encunter las empustaziuns, decorescha las meisas, beneventa e survescha ils hosps, ed ha adina la survesta.

Ch’ella, il cuschinier creativ ed il producent sappien satisfar ils hosps, garantescha gl’urari d’avertura. «Mintga sera, dalla mesjamna tochen e culla sonda, essan nus cheu per els», gi Ramona Caduff, puntuescha denton, «reservar ils plazs ei in stuer ». Sa ella tradir zatgei dalla carta da menu, ni d’in deletg dalla cuschina? «Nus havein sapientivamein negina carta. Tgei che nus survin, present’jeu mintgamai persunalmein a meisa», rispunda Ramona Caduff. Sco il cuschinier Ursin Derungs eis era ella carschida si a Dardin.

El NUA a Degen selegra la pintga squadra da presentar lur passiun pigl agen, da prender digl agen e da preparar quei ch’ei dat. Ch’ins gauda in taglier era culs egls ei ina regla fundamentala dalla gastronomia. Aschia ein inscenaziuns garantidas, cun baguos, tiasta, rieblas, tochen tiels bulius, ils pèschs, las sparglas, naven dalla carn vadi, truffels tochen tier las pastas. Surpresas ein inclusas.