Co sa cumpona la milliarda per il Green Deal?
Ils proxims 25 onns duai vegnir impundida var ina milliarda francs per mesiras da proteger il clima. Il Cussegl grond ha deliberà la gievgia la lescha da clima ed innovaziun che prescriva co finanziar la segunda etappa dal Green Deal. Per l’emprima etappa ha il Chantun gia pajà 87 milliuns. Ma co sa cumpona la milliarda per la segunda etappa?
I sa tracta dad ina finanziaziun speziala ch’ins po s’imaginar sco in’avnaun. Sco emprim metta il Chantun 200 milliuns en questa avnaun. Suenter flueschan mintg’onn fin il 2050 imports da differentas funtaunas en l’avnaun. Da la taxa sin camiuns, l’uscheumnada LSVA, èsi radund 17 milliuns l’onn, tge che fa en tut 425 milliuns. Era daners ch’il Chantun retschaiva da la Banca naziunala culan per part en l’avnaun. Il Chantun quinta en media cun 10 milliuns l’onn, fa en tut 250 milliuns. En pli po il Cussegl grond decider mintg’onn en il rom dal budget u tar in rendaquint positiv da conceder ulteriurs daners per il Green Deal. Là quinta il Chantun cun circa 100 milliuns francs fin il 2050. (fmr/vi)
Gust da leger dapli?