Sgürà la cuntinuaziun
Archiv Cultural Engiadina Bassa
L’Archiv cultural d’Engiadina Bassa ha tgnü in venderdi saira sia radunanza annuala a S-chadatsch. Sper las tractandas üsitadas han gnü lö eir tschernas.
L’es bainschi plüchöntsch attempà, il public interessà per l’actività da l’Archiv cultural d’Engiadina Bassa (ACEB), ma l’es ourdvart fidel. Il president Jon Duri Tratschin ha dat il bivgnaint ad üna quarantina da persunas, quai chi fa oura ün quart dal nomer da commembers. Las tractandas üsitadas sco’l protocol da l’ultima radunanza, il quint annual da gestiun 2024 cul rapport dal post da revisiun sco eir il preventiv pel 2025 sün gnüdas approvadas sainza discussiun.
A la suprastanza cul chaschier Beat Hofmann esa gnü dat dis-charg. Ils preschaints han pudü constatar cha la seguonda etappa da la fabrica es illa fasa da realisaziun. La fatschada vain isolada e las fanestras vegnan rimplazzadas.
Tractanda 7 düra lönch
La tractanda 7 vaiva il titel «Cumgià». Ed id ha dat ün pitschen exodus culla retratta da la bun’orma da l’ACEB, Cla Rauch, e cullas demischiuns da quatter suprastants. Il president scadent Jon Duri Tratschin ha ingrazchà il prüm a Cla Rauch chi ha lavurà cun energia instancabla daspö chi dà l’archiv, nempe daspö il 2011. Lura ha’l ingrazchà al vicepresident Peder Rauch chi’d es stat 15 ons in suprastanza. Peder Rauch es stat quel chi, in sia funcziun da secretari da l’anteriura Pro Engiadina Bassa (PEB), ha chattà finalmaing il lö per l’archiv illa scoula a S-chadatsch. Quist stabilimaint es daspö il 2021 in possess da la Società ACEB.
Tschels duos suprastants chi s’han retrats sun Curdin S. Brunold davo nouv ons e Mario Pult davo trais ons. Eir ad els esa gnü ingrazchà. Per finir ha il vicepresident Peder Rauch tgnü la laudatio per Jon Duri Tratschin chi’s retira dal post davo esser stat nouv ons president. Peder Rauch ha quintà da las staintas da chattar il lö, da la gronda furtüna d’avair gnü cun Domenic Scharplatz ün prüm president activ e fich cumpetent e da la creaziun da la Fundaziun Archiv cultural. Quista ha pudü cumprar la chasa a S-chadatsch, rimplazzar il s-chodamaint cun sonda geotermicas e realisar las lavurs sanitaras bsögnaivlas. Peder Rauch ha ingrazchà a Jon Duri Tratschin per sia gronda lavur exemplarica sco president.
Tschernas bain pardertas
Be il chaschier Beat Hofmann «surviva» in suprastanza. Grazcha ad üna buna preparaziun esa gratià da chattar glieud chi’d es pronta da cuntinuar culla lavur. Sco president es gnü tschernü Ruedi Bruderer e da la nouva suprastanza fan part Corina Caviezel-Stupan, Jon-Fadri Tönett ed Andri Janett. Cun grond applaus ha la radunanza tschernü a quistas persunas.
Truvaglias e bavarella
A la fin da la radunanza ha quintà Mario Pult da sias truvaglias in chalenders vegls ed in supplemaints dal Fögl Ladin. Intant cha’ls vegls chalenders sun divertents grazcha a lur anecdotas originalas, dan las scuvertas i’ls supplemaints dals ons 1930 fin 1960 da pensar. Id es impreschiunant da dudir e leger dal grond ingaschamaint cultural e politic davart Engiadinaisas ed Engiadinais, pustüt da giuvna età, per lur patria. Avant co far adöver da la meritada bavarella ha il referent rendü attent al davopro (dessert) dal ‹Sain Pitschen› dal 1956, chi tuna seguaintamaing: «Il scort ceda – ün’errur fatala chi ais la cuolpa cha la pluffrantüm cumanda il muond.»
Gust da leger dapli?