Espresso cun zucher raffinau
Columna
Jeu mon buc el caffé per anflar cumpignia. Jeu mon per beiber in caffè (tgei fina nianza denter quels capials sil bustab final). Jeu mon suletta. Forsa leger in tec la gasetta, sortir patratgs, schar per in mument il mund ordeifer. Quei ei il plan. Il plan funcziuna mai.
Tut tenor nua che ti vul beiber in caffè, ei quei buc in’intenziun solitarica, mobein in eveniment social. E quei era sch’ins seplacca sapientivamein vid la pintga meisa per duas persunas. Sche pusseivel el cantun. Davos la plonta. Culla gasetta. Ei va buca treis minutas entochen ch’enzatgi pren medemamein plaz culs plaids «Jeu vi nuota disturbar». Mo manegia atgnamein: «Jeu drovel uss in publicum.»
Dacuort sundel jeu puspei stada. Espresso, gasetta, sulegl da primavera, tut pareva en uorden. Lu ei signur B. vegnius. Scolast pensiunau cun preferenza per la politica locala e l’intensitad dils suns e tuns. El ei sesius senza invit, ha empustau ina minerala ed ha detg, miez si per mei e miez el nuot: «Sas, pli baul era quei cheu in liug da sentupada. Ussa sesan tuts cheu cun lur telefonins.» Jeu hai mirau sin miu espresso, sin mia gasetta e sun sedumandada, schebein jeu seigi retro ni forsa suspectusa.
Strusch ei signur B. ius, ei dunna C. vegnida. Ella ha purtau ina petta, secapescha fatga sezza ed ha annunziau dad ault che quella seigi bia megliera che quella dall’jamna vargada: «Sas, quella che la Tudestga haveva fatg, jeu detg a ti, la pasta era propi curiosa.» Jeu hai dau il tgau curteseivlamein, hai survegniu in toc ed hai aschia fatg part ufficialmein dalla cumissiun da degustaziun dil vitg. Bravo.
Aschia va quei. Ins vegn persula e va informada. Davart la sanadad da treis vischins, sur dil stan da vendita d’ina casa a Dardin e sur dalla curella ch’enzatgi a Glion fetschi caschiel nuorsa en tschaler. Sche quei constat? Buc idea. Mo igl ei vegniu plidau cun ina seriusadad sco sch’ei mass per in resultat d’ina votaziun naziunala.
Jeu hai bugen quels muments el caffé. Propi. Era sche jeu hai magari suenter il sentiment d’esser stada plitost part d’ina emissiun da radio che d’in suentermiezdi quiet. Igl ei quei equiliber tipic denter vischinonza ed atgnadad che fuorma nossa regiun. Ins s’enconuscha ed ins lai tuttina en ruaus tschella persuna. Pil pli.
Miu espresso ei staus freids e la gasetta buca legida. Mo jeu hai astgau rir, dar il tgau, quescher, observar e la finala hai aunc giu in recept per ina petta da rabarbra en sac. Per in mument sun jeu stada al puls, senza curdar si. Ed enzaco ei quei gest stau quei che jeu hai duvrau.
Ina remarca finala: En cass che vus entupeis mei a buend espresso, prendi plaz. Jeu selegrel!
Patricia Tschuor-Marques viva a Rueun, ha gugent in bun espresso, fins patratgs e leghers cumpogns da maisa.
Gust da leger dapli?