«Que nu rivi da fer a lungia vista»
L’ustaria Croce a Samedan ho zieva duos ans posa darcho aviert sias portas in november da l’an passo. Üna denunzcha causa cha’ls giasts haun fümo i’l local, ho intaunt però pissero cha la gestiunaria nu riva pü a ragiundscher las entredas scu avaunt il scumand da fümer – e perque ho ella uossa lantscho ün crowd-funding.
L’ustaria Croce a Samedan saro üna da las pü cuntschaintas in Engiadin’Ota e que daspö diversas generaziuns. Las localiteds i’l plaun terrain d’üna chesa engiadinaisa immez il cumün sun nempe daspö decennis ün lö d’inscunter per baiver üna, ster da cumpagnia e fer festa.
Il Croce d’eira però fin la fin november 2024 serro per var duos ans, ma avaunt tschinch mais s’haun las portas darcho aviertas. E que na scu nouv local da «schickimicki» u cun ün nouv concept – dimpersè scu üsito scu ün’ustaria da cumün pels indigens, inua cha que’s chatta per ir a baiver üna zieva la lavur u la fin d’eivna. Ma la nouva gestiunaria, Stephanie Hunziker, ho causa ün incidaint già difficulteds da sgürer la finanziaziun da la gestiun. Ed ella ho perque lantscho ün crowd-funding.
Denunzcha causa fümer
«Eau sun riveda cun l’auto sü cò», disch Stephanie Hunziker cun ün umur sech a la dumanda cu ch’ella saja riveda in Engiadina. Oriundamaing deriva ella dal chantun Soloturn, ho vivieu bgers ans i’l Vallais ed es gastronoma cun corp ed orma. Speratiers ho ella eir auncha sia egna ditta da management d’events. La via in Engiaidna ho ella alura chatto düraunt corona ed est resteda picheda.
«Nus vains cumanzo propi bain la stagiun cò i’l Croce, bgera glieud es gnida ed eau d’he eir gieu bunas entredas. Be cha zieva trais mais ho que do üna reclamaziun e denunzcha causa cha la glieud ho fümo i’l local», disch Stephanie Hunziker. Ella agiundscha ch’ella hegia perque stuvieu pajer üna granda multa – e cha que nu saja uossa pü permiss da fümer i’l Croce.
Pü pussibel da declarer l’ustaria scu fumoir
Fin avaunt la reavertüra l’an passo es il Croce – chi’d ho i’ls ulteriurs plauns da l’edifizi eir auncha üna pensiun – gnieu mno be d’üna gestiunaria. E perque es que eir sto pussibel da declarer las localiteds da l’ustaria i’l plaun terrain scu fumoir da tuot la chesa. Daspö il november sun però la pensiun e’l restorant separos ün da l’oter, dimena ils duos plauns vegnan mnos da duos differentas gestiunarias. E perque nu po l’ustaria uossa pü gnir gnir mneda e declareda scu fumoir.
E que es uossa precis eir il problem per la gestiunaria. Tenor ella riva la glieud bainschi auncha a baiver qualchosa. Ma siand cha’ls giasts haun tuot il temp dad ir oura per fümer, nu vain pü bavieu uschè bger, siand cha que sun adüna in muvimaint. Impü ho que uossa eir già do reclamaziuns causa canera dadour il restorant. «Ed uschè nu riv eau pü propi da ragiundscher las entredas scu auncha avaunt la multa. Siand ch’eau d’he eir duos impiegos chi’m sustegnan, d’heja uossa da finanzier a travers il Croce cun mia ditta dad event-management. Ma que nu rivi da fer a lungia vista», declera Stephanie Hunziker.
Cuvrir üna part dals cuosts fixs
Avaunt var ün mais ho la gestiunaria perque lantscho ün crowd-funding per pudair sgürer la gestiun dal Croce almain fin la fin da quist an e per pudair almain pajer üna part dals cuosts fixs. Perche cha Stephanie Hunziker ho eir già miss ad ir ün program culturel e d’activiteds cun concerts, livestreams ed occurrenzas, il quêl chaschuna eir auncha cuosts impü.
«Que nun es uschè ch’eau vögl simplamaing raps, que’m vo per pudair lascher avierta quist’ustaria importanta per la cumünaunza da Samedan e da spordscher als indigens ün lö d’inscunter per tuot an», disch Stephanie Hunziker. Ella agiundscha ch’ella nun hegia fin uossa però gieu ün grand sustegn cun quist crowd-funding e ch’ella vöglia perque aunch’üna vouta prolunger quel fin la fin meg.
Gust da leger dapli?