Meglier quen che spitgau pil Spital regiunal Surselva
La Spital regiunal Surselva SA ha contonschiu igl onn vargau in meglier resultat che quintau ed ha in niev president dil cussegl d’administraziun. Alla radunonza dalla societad la gievgia sera ei Gieri Cathomas daventaus successur da Thomas Buchli. Matthias Spielmann surpren ad interim la posiziun da CEO.
«Grazia ad in management da cuosts consequent e risguardond las finamiras fixadas eis ei stau pusseivel da reducir las contribuziuns dalla cunvegna da prestaziun cullas purtadras ed ils purtaders per rodund 1,14 milliuns francs. Il quen siara cun in gudogn dalla bilanza da 22 355.15 francs», scriva la Spital regiunal Surselva SA en ina communicaziun als mieds da massa. Senza risguardar las contribuziuns dallas purtadras e dils purtaders havessi il spital nudau ina sperdita annuala da 3,07 milliuns francs. Inclusiv las contribuziuns importa la marscha dad EBITDA 3,38 %. «Quei muossa che la finanziaziun dallas tariffas actualas per las prestaziuns medicinalas ei insufficienta», communichescha il spital.
«Mantener il spital»
Ferton ch’il diember da tractaments ambulonts ei carschius a moda solida, eis ei buca stau pusseivel d’ulivar la digren dil diember da cass staziunars. Quei malgrad differentas mesiras ed adattaziuns structuralas. Sco gia igl onn precedent ei il diember da pazientas e pazients cun in tractament staziunar sereducius per ulteriurs 7 %. Quei corrispunda a 169 cass. «Nus lein mantener nies spital a Glion per l’entira regiun e menar el egl avegnir cun resilienza e garanzia a liunga vesta», accentuescha Thomas Buchli, president dil cussegl d’administraziun. Per contonscher quella finamira stoppi il spital prender impurtontas decisiuns e purtar quellas ensemen cullas purtadras ed ils purtaders. Ei resti la finamira da garantir a liunga vesta il provediment medicinal acut dalla populaziun e dils numerus hosps da vacanzas en Surselva.
In niev president
Gia avon la radunonza generala dalla Spital regiunal Surselva SA da gievgia, ils 15 da matg 2025, haveva Thomas Buchli declarau sia demissiun sco president dil cussegl d’administraziun. Sco siu successur ei Gieri Cathomas vegnius eligius. Plinavon sesa René Epp, president dalla SanaSurselva, da niev el cussegl d’administraziun. Thomas Buchli ha dau in’egliada anavos sin siu temps d’uffeci: in temps interessant, mo per part era turbulent. Il CEO dalla Spital regiunal Surselva SA, Fadri Bisatz, banduna l’interpresa miez zercladur 2025. Sco soluziun ad interim eis ei stau pusseivel d’engaschar Matthias Spielmann che dispona d’ina experientscha da biars onns sco CEO en differents spitals. (cdm/fmr)
Gust da leger dapli?