«Pil svilup futur ei quei in pass essenzial»

La nova colligiaziun directa Mustér-Biasca / Biasca-Mustér ei in survetsch dil traffic public. Duas interpresas, AutoDaPosta Svizra ed Autolinee Bleniesi, porschan e portan communablamein quel La FMR ha discurriu cun Massimo Ferrari, il president dalla societad da transport public dalla Val Blegn.

parter

La societad Autolinee Bleniesi exista pér dapi 1973. Igl ei gl’onn ch’il cantun Tessin ha serrau la viafier Biasca-Acquarossa e remplazzau ella cun bus. Ina viafier da biebein 14 kilometers haveva circulau dapi 1911 e garantiu il transport public ella Val Blegn. Oz fa Autolinee Bleniesi quei cun 20 bus ed ina squadra da 20 persunas.

Massimo Ferrari, il di dils 14 da zercladur 2025 ei per Vus franc in special?

Gie, igl ei in di da fiasta, in di d’entschatta d’in project daditg desiderau. D’ussa naven dat ei quater gadas a di in bus direct da Biasca tochen Mustér sul Pass Lucmagn. Per mei va in siemi en vigur, igl ei ina colligiaziun traversala dallas Alps centralas. Gia avon 120 onns han ins vuliu realisar ina tala, quei ch’ei deplorablamein buca reussiu culla viafier. Perquei ei quei in di historic per tuts participai. Jeu sun fetg engrazieivels co la collaboraziun culla Pro Lucmagn ha funcziunau e co ella funcziunescha vinavon. Jeu manegiel che quella traversala directa seigi ina plivalur enorma cun effect fetg impurtont. Pertgei tenor mei traversa quella lingia nova in parc natiral enorm cun grond potenzial futur.

Vus discurris d’ina colligiaziun dil traffic public. Il traffic privat drova gia abundontamein quella colligiaziun, ni buc?

Quei ei clar, el center ei il traffic public. Gest quella pusseivladad muncava entochen oz per utilisaders dil traffic public. Cunquei savein nus serrar ina ruosna. Ils bus e las postas che curseschan sul Lucmagn garanteschan alla glieud colligiaziuns naven da Biasca e naven da Mustér. La situaziun ei cumparegliabla cun quella da Cuera a Bellinzona.

Co s’immagineis Vus che quei survetsch niev dil traffic public tras las Alps sesviluppescha vinavon?

Era sch’ei para oz in project pign, ha quel in grond potenzial. Oz havein nus fatg in pass impurtont pil svilup futur. Ils passagiers cun valischas e bagascha viagian ussa cumadeivlamein da Biasca a Mustér e viceversa senza stuer midar bus ni auto da posta. Quei ch’ei da dir ei che la colligiaziun nova ha influenza sil prezi dil bigliet, il viadi vegn ad esser pli bienmarcaus ch’entochen oz. Gl’emprem punct dil svilup havein nus cunquei realisau. Ussa stuein nus luvrar vinavon vid il marketing e la promoziun da quella colligiaziun nova. Segiramein ch’ei vegn a dar il futur aunc beinenquala novaziun. Jeu selegrel perinagada dil svilup favureivel denter sid e nord.

Co funcziunan ils contacts denter gl’Auto da posta Grischun e Voss’interpresa?

Nus collaborein gia dapi biars onns. Omisduas lingias menavan gia entochen oz sil Lucmagn. Nies bus turnava engiu a Biasca, e quel dalla posta anavos a Mustér. Communablamein havein nus reglau ils detagls e l’organisaziun dil niev survetsch da transport. Nus partgin communablamein ils cuors da viadi denter las duas destinaziuns. Ils uraris ein fixai ed jeu sun fetg cuntents dalla collaboraziun.

Manegieis Vus che la colligiaziun Biasca-Mustér / Mustér-Biasca contribueschi era al svilup economic?

Segiramein che quei vegn ad haver era in effect economic. La Surselva ei ina regiun ch’ei organisada turisticamein da maniera perfetga. Da nossa vart essan nus organisai dameins bein. Nus savein persuenter porscher ina bellezia cuntrada cun grond potenzial. Differents projects sesviluppeschan tier nus tec a tec. Per exempel Campra cun siu center sportiv e cuorsa liunga. Ni ad Olivone nua ch’il TCS renovescha e restructurescha il campadi, era leu ha il center sportiv in pulit success. Buca emblidar vuless jeu las opziuns fetg interessantas dil proxim futur tier nus en Val Blegn.

Tgeininas ei quei?

Inagada ei quei ils bogns termals ad Acquarossa. Quels existan aunc, ein denton buca en funcziun. In project da revitalisar e reactivar quels implonts ei sin meisa. Buca il davos han ins instradau quei project ad Acquarossa pervia dalla nova colligiaziun directa sul Lucmagn. Lu havein nus aunc la veglia e renomada fabrica da tschugalata Cima Norma a Dongio. Era leu dat ei in project fetg concret da reactivar quella. Unir e colligiar differents projects blegnes cun projects sursilvans ei, tenor mei, fetg interessant ed attractiv pil futur.

Il problem vegn gl’unviern ad esser. Ils cuors Biasca-Mustér / Mustér-Biasca curseschan gie mo la stad?

Gie, pil mument ein ils cuors limitai tochen ils 19 d’october. Era quei punct ha connex cul svilup dil futur. Ei resta da ponderar co ins savess garantir al traffic public ina colligiaziun digl entir onn. Gest pil center da cuorsa liunga a Campra fuss quei d’avantatg.