Nova lescha sco emprim pass
Ils proxims diesch onns vul il Chantun investir tranter 40 e 50 milliuns francs per cumbatter la mancanza d’abitaziuns. La nova lescha ha il Cussegl grond deliberà la gievgia. Ils burgais han indeblì la proposta oriunda da la Regenza. La sanestra è trumpada.
Il Cussegl grond ha deliberà la gievgia ina nova lescha per promover spazi d’abitar. Ils proxims diesch onns vul il Chantun investir fin a 50 milliuns francs per cumbatter la mancanza d’abitaziuns. Las partidas burgaisas han indeblì il sboz da lescha da la Regenza.
Inizià da PS e Center
La lescha per promover il spazi d’abitar è vegnida iniziada entras intervenziuns da la PS e dal deputà lumnezian Gian Derungs dal Center. La Regenza ha proponì mesiras per mitigiar la situaziun d’abitar per part precara.
Las mesiras prevesan tranter auter favuraivels emprests per cooperativas che construeschan abitaziuns favuraivlas. Famiglias cun ina entrada suttamessa a la taglia da maximalmain 60 000 francs survegnan contribuziuns per cumprar, bajegiar u sanar ina chasa.
La sanestra è trumpada
Per l’ala sanestra è la lescha stada memia pauc ambiziusa e curaschusa. Ella ha perquai fatg differentas propostas. Uschia ha la PS per exempel vulì stgaffir in fond da 100 milliuns per sustegnair patruns u patrunas da construcziun che erigian abitaziuns favuraivlas.
Ma las propostas da la sanestra n’han betg chattà sustegn. «La lescha da promover spazi d’abitar na merita betg ses num», ha ditg Franziska Preisig da la PS. Sco che la deputada da l’Engiadin’Ota èn ils blers socialdemocrats stads trumpads ed han votà il davos cunter la lescha. Il Cussegl grond ha deliberà la lescha cun 87 cunter 23 vuschs.
Naginas contribuziuns à fond perdu
Ma era la Regenza n’è per part betg stada d’accord cun las decisiuns dal Cussegl grond. Sia proposta da conceder a cooperativas contribuziuns à fond perdu da 2 % dals custs d’investiziuns, è vegnida stritgada. In tal agid da partenza per cooperativas fiss tenor la PPS stà in fauss stimul ed era la PLD è s’exprimida encunter.
La Regenza saja pertscherta che questa lescha na possia betg schliar la mancanza dad abitaziuns pajablas, hai gì num. «Nus duvrain ina proceder modular. Cun questa lescha avain nus fatg in emprim pass», ha ditg cusseglier guvernativ Marcus Caduff.
Co sa cumponan ils 40 fin 50 milliuns?
Ils daners ch’il Chantun po impunder ils proxims diesch onns per promover abitaziuns favuraivlas sa cumponan sco suonda: Per l’ina sa tracti d’in credit d’impegn da 15 milliuns francs per emprests a cooperativas per ils onns 2026 fin 2035. Per l’autra datti tranter 2 fin 5 milliuns francs l’onn per gidar famiglias en relaziuns modestas che vulan bajegiar chasa.
President e vicepresidenta per il 2026
Cun bun ried è il Cussegl grond s’avanzà la gievgia cun sias tractandas. Sper la lescha per promover abitaziuns favuraivlas ha el decidì il suandant:
Martin Bühler presidiescha il 2026 la regenza grischuna. Cun 110 da 114 vuschs ha il parlament tschernì il minister da finanzas. Sco vicepresidenta è vegnida elegida Carmelia Maissen cun 105 da 115
Il parlament ha deliberà ina revisiun parziala da la lescha per proteger la populaziun en il chantun. Cun la revisiun duain vegnir stgaffidas cundiziuns optimalas per che mintga catastrofa e situaziun d’urgenza possia vegnir superada pli svelt ed a moda pli nuncumplitgada ch’enfin qua.
Uffiziers ed insumma il cader dal servetsch civil duain survegnir en l’avegnir indemnisaziuns sco ils cumandants dal servetsch civil. Quai è ina da las midadas da la revisiun da la lescha per la protecziun civila. La debatta davart questa revisiun n’è anc betg stada terminada cun la fin da redacziun.
Gust da leger dapli?