Barat culturel traunter la Catalogna e l’Engiadina

Chesa Planta Samedan

parter

Cul titel «sveler ed infiler» ho lö in Chesa Planta Samedan dals 17 gün fin als 20 gün 2025 ün barat culturel traunter la Catalogna e l’Engiadina. «Cun sieu scharm e sia richa istorgia es la chesa signurila predestineda scu lö d’inscunter per testas finas e creativas», comunichescha il team da la Chesa Planta. La poeta rumauntscha Jessica Zuan e’ls duos Catalans, Antoni Clapés, poet, traductur ed editur, e Dolors Udina, traductura da litteratura ed anteriura docenta per traducziuns, passaintan ün pêr dis a Samedan in ün allogi privat. In üna da las localiteds in Chesa Planta Samedan s’occupane düraunt l’intera eivna cun duos temas: d’üna vart cun l’elavuraziun d’üna fuorma ventura per ateliers da lavur per linguas minuritaras in quista chesa istorica. Da l’otra vart lavurane düraunt la «fabrica da reflexiun» vi da nouvas poesias chi vegnan in seguit tradüttas dal rumauntsch in catalan e viceversa. Cha’l böt saja da publicher düraunt quist an las poesias chi naschan in ün ambiaint alpin e madüraron infra ün pêr mais i’l dachesa maritim da poeta e poet, as legia illa comunicaziun.

In venderdi, ils 20 gün, a las 17.30 preschaintan Jessica Zuan, Antoni Clapés e Dolors Udina lur experienzas e legian our da lur ouvras. Il team da la Chesa Planta invida ad üna «maiseda da discussiun ed ad üna ‹hora del vermut›, üna tradiziun catalana, inua cha amias ed amihs e famiglia as chattan per üna bucheda». Annunzchas sun da drizzer a la Chesa Planta Samedan, info@chesaplanta.ch u 081 852 12 72. (cdm/fmr)