L’elita dil schah semesira a Mustér

Dils 12 entochen ils 20 da fenadur 2025 ha il campiunadi svizzer da schah liug per l’emprema ga a Mustér. 275 giugaduras e giugadurs dall’entira Svizra semesiran en plirs turniers. Alla regiun da vacanzas sisum la Surselva seporscha la caschun da sepresentar all’elita dil schah e biars accumpignaders.

parter

Avon in onn ha il campiunadi svizzer da schah giu liug a Flem ed uonn ei quella concurrenza danovamein en Surselva. Dils 12 entochen ils 20 da fenadur vegnan las campiunessas ed ils campiuns erui a Mustér. Igl ei il 125avel campiunadi svizzer dalla Federaziun da schah svizra. Ils campiunadis han liug el Center Fontauna che porscha ideala infrastructura per in eveniment da quella grondezia.

Differents turniers

Sco la federaziun da schah scriva en ina communicaziun als mieds da massa, cumpeglia il program il campiunadis svizzer dallas categorias umens, dunnas, seniors e juniors. Leutier vegn purschiu tschun turniers per amaturs. Tut en tut vegnan 275 dunnas ed umens a semesirar a quei arranschament naziunal. Tenor la federaziun cumbineschan biaras participontas e biars participonts ils turniers cun passentar lur vacanzas sisum la Surselva. Dil reminent: Igl ei buca l’emprema ga che gronds turniers da schah han liug a Mustér. Ils onns 1991 e 1995 ein vegni arranschai el Center Fontauna turniers naziunals dall’Uniun da schah dils luvrers cun mintgamai entochen 300 participontas e participonts.

Far enconuschenta la regiun

Ch’il campiunadi svizzer da schah ha liug a Mustér ei il meret da Sedrun Mustér Turissem (SMT). «Nus havein procurau che quel hagi liug a Mustér e havein la funcziun da coordinar igl arranschament denter la Federaziun da schah svizra ed ils partenaris locals», di Nicole Weber da SMT. Denter auter ha ei giu num cattar in dormitori per las participontas, ils participonts e las persunas accumpignontas, mo lu era da porscher in program da rama. «Nus essan representai cun ina persuna el comite d’organisaziun e sustenin finanzialmein quei arranschament, denter auter la summa da premis. Il Center Fontauna vegn mess a disposiziun dalla vischnaunca da Mustér», di Nicole Weber. Sin fundament da quei campiunadi sa la regiun sepresentar e porscher la caschun allas participontas ed ils participonts d’emprender d’enconuscher Mustér e Sedrun. «Quei ei glieud che havess forsa buc anflau la via tier nus», manegia Nicole Weber. Da 275 participontas ni participonts serendan plirs cun confamigliars ni partenaris per diesch dis a Mustér: «Quei generescha ina plivalur, denter auter sin fundament da pernottaziuns.»

Plirs turniers

Il program dils campiunadis cumpeglia treis turniers serrai per umens, dunnas e seniors (mintgamai nov rundas). Leutier vegnan ils turniers dils campiuns cun nov rundas ed ils turniers principals cun mintgamai siat rundas. Ils campiunadis svizzers ed ils turniers dils campiuns entscheivan la sonda, ils quater turniers principals la dumengia. Sco la Federaziun da schah svizra scriva en ina communicaziun als mieds da massa, ein aspectaturas ed aspectaturs cordialmein beinvegni. L’entschatta dallas concurrenzas ei mintgamai allas 13.30 cun excepziun dalla runda finala ch’entscheiva allas 09.00. 25 partidas vegnan emessas directamein egl internet sillas plattafuormas Lichess, ChessBase e Chess.com. Igl ei quei 15 partidas principalas dils campiunadis svizzers e diesch partidas principalas dils turniers dils campiuns.

Ils defensurs dils tetels

Dalla partida als campiunadis svizzers a Mustér ei il defensur dil tetel dils umens Sebastian Bogner da Nossadunnaun sco era la defensura dil tetel dallas dunnas Mariia Manko da Granges-Paccot. Omisdus ein lu era tschentai sco numeras 1. La numera 2 dalla gliesta da partenza dils umens ei Li Min Peng d’Adliswil, in ulteriur giugadur naziunal dalla Svizra. El ei oriunds dall’Ucraina e ha gudignau il turnier federal l’entschatta zercladur a Pfäffikon/SZ. Suenter Dieter Kellter (1961) savess el esser il secund giugadur che gudogna il medem onn il turnier federal ed il campiunadi svizzer. El campiunadi dils seniors maunca il campiun digl onn vargau Marcel Marentini da Bottighofen. Numera 1 da quei turnier ei Urs Rüetschi da Gunten. Numera 10 dil campiunadi dils seniors ei il Grischun Slobodan Adzic da Cuera.