In’oasa da stad el marcau

Dapi igl avrel 2025 datti in local d’art e cultura el marcau vegl da Glion. Gievgia vargada, ils 17 da fenadur 2025, ha giu liug el local da cultura ed art Zezzaneera la vernissascha d’ina exposiziun da cartas postalas creadas da 38 artistas ed artists dalla regiun e d’ordeifer la Surselva.

parter

«Beinvegni all’oasa da stad a Glion.» – Aschia ha Bea König, la gestiunaria dalla galleria Zezzaneera che sesanfla gest all’entrada dil marcau vegl da Glion, salidau las ver 30 dunnas ed umens che han dau suatientscha all’invitaziun dil local d’art e cultura ch’ei vegnius aviarts avon treis meins. «Gagl, legher ed artistic daventa la stad ella Zezzaneera», ha la menadra dil local detg ed ha animau il publicum da prender peda da mirar las 160 fotografias dallas 38 artistas ed artists ch’ein per part era stai presents alla vernissascha dalla davosa gievgia sera.

L’entschatta dalla carta postala

El center dall’exposiziun stattan cartas postalas ch’ein vegnidas creadas d’artistas ed artists dalla regiun, dalla Svizra mo era digl exteriur. Presentadas vid las preits dil local vegnan fotografias, graficas, dessegns e cartas postalas ch’ins ha duvrau per illustraziuns. Bea König che ha supriu la primavera la gestiun artistica dalla galleria ei s’occupada en siu plaid d’avertura dalla historia dalla carta postala ch’ei vegnida introducida en Svizra igl onn 1870. Egl exteriur avertevi ins dil secret da posta, ha la gestiunaria detg. «La posta austriaca-ungaresa ha communicau da lezzas uras ufficialmein ch’ella suprendi negina responsabladad pil cuntegn dils texts», ha Bea König detg. «Mo cul turissem ei la carta postala daventada in product da vendita impurtont pils hotels e loghens da bogn e da vacanzas.»

Cartas postalas ed auter

Bea König ha accentuau che la finamira dalla galleria Zezzaneera a Glion seigi buca da far reclama pils sujets dallas cartas postalas turisticas dils decennis vargai, mobein da mussar con multifara che la lavur artistica cun cartas postalas ei. «Ils 160 motivs ein cartas singulas ni era serias che san era vegnir cumpradas tier nus per dus entochen tschun francs per toc». Exponi sin in indrez da pender si resti ein plinavon era schigientamauns creai da designeras enconuschentas sco Mara Tschudi ni Lea Krebs. Ed all’entrada offerescha Zezzaneera «glatschs dil bein puril da Breil» e da «Sursleva Gelato da Castrisch.» Ell’exposiziun «Beinvegni ell’oasa da stad» ein denter auter exponidas lavurs da ­Mirko Baselgia, Ester Vonplon, Bridget Wilkin e da biars auters.

La galleria Zezzanera ei aviarta mintgamai la gievgia dallas 14.00–20.00 ed il venderdis e la sonda dallas 14.00–18.00. L’exposiziun da fotografias cuozza entochen ils 29 da settember 2025.