«Manar spranza i’l muond cun nossa musica»

La band grischuna Happy For Real – chi consista da Marcus Petendi ed Olivia Virgolin – s’ha missa sco finamira da scriver chanzuns cun ün’atmosfera cuntainta ed optimistica. Quista cuntantezza es eir d’udir sün lur plü nouva EP «Solar Storm», chi’d es cumparüda quist gün. Mità da quist mais vain la band Happy For Real implü undrada cun ün premi da promoziun da cultura da la cità da Cuoira.

parter

Il muond rumantsch cugnuoscha a Marcus Petendi – chi’d es oriundamaing dad Ardez – sco ün osp dad «Ils Dus Da Nus», dimena dal podcast ladin da Radiotelevisiun Rumantscha. Per quel podcast registrescha Marcus Petendi eir tuot ils suns e tuns svess, ils quals inrichischan las emischiuns tanter las baderladas dals duos amis.

Ma sperapro fa el daspö si’infanzia eir amo blera musica. E quai tanter oter insembel cun Olivia Virgolin da Grüsch, chi lavura là sco magistra primara. «Nus ans vain per cas imprais a cugnuoscher dürant ün festival a Cuoira dal 2020, cumanzà a scriver songs insembel e lura ter svelt decis cha nus vulain far quai plü serius», disch Marcus Petendi. Davo avair cumpuonü e registrà las prümas chanzuns tillas han ils duos musicists lura publichadas e surgni ün bun resun dals auditurs sco eir da las staziuns da radio. Quai es stat il punct da partenza per lur band Happy For Real.

Plü simpel da scriver chanzuns tristas

Sco cha’l nom da la band Happy For Real tradischa fingià – tradüt da l’inglais significha quai in circa «cuntaint pelvaira» – vöglian Marcus Petendi ed Olivia Virgolin scriver chanzuns cun ün’atmosfera positiva. «Bleras bands dal gener indie sco nus o acts da pop fan pelplü musica trista. Id es plü simpel da scriver chanzuns tristas o melancolicas e nos böt esa dad almain provar da manar daplü spranza i’l muond cun nossa musica», declera Marcus Petendi.

Las chanzuns scrivan ils duos commembers da la band adüna insembel. Dal ritem, sur las melodias fin pro’l text nascha tuot in üna stanza dürant cha’ls duos musicists creeschan nouvas ouvras. Dimena els nu rivan fingià pro lur inscunters cun aignas ideas e tillas muossan lura ün a l’oter. «Quai douvra ün pa daplü nerva, temp e pazienza. Ma per nus duos es quai ün process bler plü interessant», disch Marcus Petendi, chi suna la guitarra, il bass e chanta. Olivia Virgolin suna ils medems instrumaints ed amo implü ils keyboards. Sün lur registraziuns sun eir adüna be els duos d’udir ed els sunan là tuot ils instrumaints svessa.

Na tour dalunga la prüma idea

Ma co scriva uossa Happy for real sias chanzuns cuntaintas? Han els üna recetta secreta per quai? «Tenor nus s’haja da stübgiar ün pass inavant e na dalunga tour adüna la prüma idea, perche cha quellas es pelplü melancolica», disch Marcus Petendi ed agiundscha: «Musicalmaing e liricamaing giaina uschea üna via cha nus nu pigliessan uschigliö e quai renda plü frais-ch ed optimistic la musica – almain in nos cas.»

Scha Happy For Real ha cumpuonü las chanzuns, lura va la band adüna per duos eivnas in ün studio a Wales per tillas registrar. Quai han els fingià fat pro lur prüma EP «Desperate Art», chi’d es cumparüda l’on passà, ed eir darcheu in october 2024 per registrar lur plü nouva EP «Solar Storm».

L’uraglia na svizra

A Wales collavura la band cun ün producent da musica indigen, chi tils sustegna pro la registraziun cun üna «uraglia na svizra». «Nus collavurain cun el per nu stuvair trar svessa tuot las decisiuns in connex cul sound. Ma eir per survgnir ün cling, chi’s disferenzchescha dad otras bands svizras e per integrar nouvas influenzas», declera Marcus Petendi.

El agiundscha chi detta in Svizra be passa trais gronds producents da musica chi registreschan quasi tuot las bands cun ün simil sound fich grond e net. Illa Gronda Bretagna percunter sun ils producents tenor Marcus Petendi bler plü curaschus e pragmatics. Ed els lavuran tenor il princip da plütöst tour davent elemaints e clings – alch chi renda a la fin plü interessant il sound e la musica.

Las vibraziuns in l’ajer

La EP «Solar Storm», chi consista da ses chanzuns inglaisas, es lura gnüda publichada quist gün e quella es gnüda accumpagnada d’ün film chi raquinta al medem mumaint eir l’istorgia da la EP. Happy For Real ha tanter oter fingià gnü l’occasiun da preschantar lur nouvas chanzuns sül palc da l’Open Air Lumnezia quist lügl. Ed als 15 avuost 2025 vain la band implü undrada cun ün premi da promoziun da cultura da la cità da Cuoira.

Sco cha Marcus Petendi ha tradi a la FMR vöglian el ed Olivia Virgolin sco prossem proget registrar ün inter album. Sperapro prodüan e cumpuonan els sco duo però eir amo musica per oters artists ed artistas. Perche cha la musica es e resta la gronda paschiun da Marcus Petendi sco ch’el disch, eir sch’el nu sa amo viver da quella: «Il tun am para ün fich interessant concept. Impustüt cha vibraziuns in l’ajer pon sdruagliar emoziuns in l’uman. Quai am fascinescha e per quellas emoziuns vöglia eir pisserar in avegnir cun nossa musica.»


La EP «Solar Storm» es da chattar sün tuot las plattafuormas da streaming u sün youtube. Sülla pagina da web www.happyforreal.ch as poja eir postar la EP in fuorma da vinyl sco eir verer il film accumpagnond.