In onn grass per l’Arena Alva SA
La Gruppa Arena Alva SA ha giu in bien onn da gestiun. Denter auter grazia alla natira, respectiv a duas nevaglias digl unviern vargau. Quei ha augmentau las cefras e las frequenzas. Cun 1'092'191 empremas entradas ha la sparta dallas pendicularas registrau il secund-meglier resultat dapi 1997.
«Las duas nevaglias ein vegnidas exact il dretg mument. Avon Nadal ed ad uras sillas vacanzas da sport il fevrer. Quei ha procurau per ina ferma stagiun ed ina occupaziun solida»: Quei scriva la plidadra da medias dalla gruppa, Martina Calonder, en siu invit alla 66avla radunonza generala. Gievgia, ils 25 da settember 2025 vegn il cussegl d’administraziun dalla Arena Alva SA a dar plaid e fatg da quei onn da success. Sco usitau ils davos onns ei quella radunonza generala sil Crap Sogn Gion. A quella spetga l’interpresa puspei rodund 550 acziunarias ed acziunaris. La pli gronda part da quellas persunas posseda paucas aczias, ei denton tuttina participada al svilup finanzial dall’interpresa.
15,8 % dapli
Haempa Maissen ha suttascret, en num dil directori, il rapport annual general 2024/25. La neiv che seigi arrivada ad uras avon Nadal e puspei avon las vacanzas da sport hagi contribuiu ad in resultat solid. Il diember da 1’092’191 empremas entradas hagi surpassau claramein il resultat digl onn precedent, rapporta Haempa Maissen. Lu havevan las pendicularas Arena Alva registrau ina cefra da 1’028’134 empremas entradas. Era il resultat dallas pernotaziuns selai presentar. La hotellaria, ina dallas spartas lateralas dalla gruppa, muossa in augment dad 11,6 %. Igl onn precedent eri stau 159’482 pernotaziuns, igl onn da rapport han ins dumbrau 177’980. Gl’onn da gestiun ha l’Arena Alva fatg in recav cashflow da 24’, milliuns francs, quei ein 15,8 % dapli ch’iglonn precedent. «Quei suttastreha nossa solida basa finanziala e conferma nossa capacitad d’investir a moda persistenta e d’economisar il medem mument da maniera stabila», concluda Haempa Maissen.
Gl’onn da gestiun 2024/25 han treis grondas investiziuns fatschentau la Gruppa Arena Alva. Inagada eis ei la nova halla da siglir e trenar Freestyle Academy a Murschetg. Lu ei il FlemXpress en construcziun, actualmein la davosa etappa Segnes-Cassons. Sigl unviern 2025/26 vegn quella secziun inaugurada. Sco tierz project grond menziuna il management dalla gruppa la quarta etappa dalla surbaghegiada Rocksresort. A Murschetg ein duas ulteriuras casas da pliras habitaziuns el stil da quadrel finidas ed a disposiziun.
Tgei includa la gruppa Arena Alva SA?
Il rapport annual dalla Gruppa Arena Alva cuntegn bia cefras, denter auter era informaziuns e resultats dallas singulas firmas inclusas. La Gruppa Arena Alva includa totalmein 13 firmas. Da quellas ein sis 100 % en posses dalla gruppa, numnadamein WA Bergbahnen, WA Hospitality, WA Leisure, Mountain Vision, Mountain Adventures e Startgels SA. Cun ina cumpart da 70 % ei la gruppa Arena Alva participada vid la Laax Homes SA e cun 61,6 % vid la BG Rocksresort. Alla gruppa s’auda ina cumpart da 56,3 % dalla Cassons SA (FlemXpress) e 60 % dalla Larnags SA (ustrias Lags, Curnius e Larnags). La gruppa posseda plinavon ina cumpart minoritara da 25 % dalla Finanz Infra SA e mintgamai 20 % dalla Flims Laax Falera Mangement SA e dalla Wärmeverbund Laax SA.
Rescas e schanzas dil «deal» cul maun public
Las vischnauncas Flem, Laax e Falera vulan cumprar l’infrastructura sil cuolm dallas Pendicularas Arena Alva. Dapi ils 10 da settember, cu las partenarias da contract han communicau lur intenziun, ha quella tematica aviert la discussiun publica ed ellas medias. Curdin Derungs, professer d’economia alla Scol’aulta specialisada dil Grischun, s’occupaescha dapi onns en ina da sias perscrutaziuns scientificas culla funcziun da vischnauncas sco interpresas turisticas. RTR ha dumandau el davart rescas e schanzas d’ina eventuala cumpra dall’infrastructura dall’Arena Alva. El cass specific actual puntuescha gl’expert gl’emprem: «Ei va buca per sustener ina interpresa ch’ei en difficultads finanzialas». Lu renda el attent ch’il maun public, vul gir las treis vischnauncas, vulan segirar l’influenza futura sil svilup economic dalla regiun. Sco ina resca vesa Curdin Derungs en general il scenari che las vischnauncas emprestan obligaziuns a liunga vesta. Plinavon sa ei esser ina resca sch’il maun public druvas las entradas da tscheins dallas pendicularas per auter che per mantener e renovar ils indrezs e stabiliments. Ina schanza perencunter sepresenta cun cumprar parts essenzialas d’ina firma sauna. «Las vischnauncas san influenzar direct, senza investurs jasters, il svilup economic dalla regiun», manegia Curdin Derungs. E las vischnauncas drovan ell’administraziun neginas forzas supplementaras ed experts da turissem. (rtr/fmr/abc)
Gust da leger dapli?