Novas tablas digitalas a Glion

Las duas tablas digitalas a Glion Sontga Clau Sura e Sontga Clau Sut ein quella part d’in sistem d’informaziun ch’ei vegnius realisaus digl anteriur marcau da Glion igl onn 2013, pia in onn avon la fusiun da Ilanz/Glion. Ferton che las treis petgas d’informaziun avon la Casa Cumin, alla staziun da viafier e silla Plazza Cumin han buca purtau il success giavischau ed ein vegnidas allontanadas gia paucs onns pli tard, ein las duas tablas digitalas da reclama el vest ed egl ost da Glion daventadas fetg tschercadas d’uniuns, fatschentas e d’organisaziuns dall’entira Surselva. En scadin cass ha Michael Spescha, il scarvon communal da Ilanz/Glion confirmau enviers la FMR che las duas tablas digitalas hagien sur il temps da 12 onns generau dapli entradas ch’expensas.

Quei che cuozza ditg
madira bein

Las tablas digitalas el vest ed egl ost dalla fracziun dil marcau da Glion han cumpensau naven dil november 2013 las banderolas da reclama che vegnevan stendidas dapi ils onns 1990 sur la punt da Glion. Il diember da banderolas sur la punt dil Rein e vid il tschabergal da quella carscheva ad in crescher. Entuorn igl onn 2010 ha il cantun Grischun sco anteriur proprietari dalla punt constatau in memia grond diember da banderolas e cunquei era differents prighels pil traffic.

En consequenza ha il Cantun limitau las pusseivladads da stender banderolas da reclama silla punt. Sinquei ha il cussegl dil marcau da Glion da lezzas uras schau examinar las pusseivlads da digitalisar ils eveniments e las reclamas. Suenter in project digital silla punt dil Rein che ha fatg naufragi alla radunonza communala da Glion ein ins sedecidius da cumprar las duas tablas digitalas e da postar quellas sper via all’entrada el vest da Glion e sill’altezia da l’autra entrada alla Via Sontga Clau Sut. Igl emprem temps han las tablas digitalas caschunau reclamaziuns da vischins e d’automobilists pervia dalla glisch tschorventonta. Pliras adattaziuns han purtau il success giavischau ed oz vegnan las tablas digitalas tschercadas fetg stedi per publicar occurrenzas e reclamas.

Tener a bass ils cuosts

Las tablas digitalas vegnan administradas dalla canzlia communala da Ilanz/Glion. La suprastonza communala ha relaschau igl onn 2021 ina ordinaziun che reglescha il diever ed ils prezis per occurrenzas e reclamas.

Ei dat differentas categorias pertuccont las cundiziuns ed ils prezis. Ils indigens dalla vischnaunca han cundiziuns pli favoreivlas che quels d’ordeifer ed ils interprendiders commercials. Tenor il scarvon communal Michael Spescha eri ei enconuschent dapi l’entschatta ch’il sistem digital dallas tablas funcziuneschi circa diesch onns. Ussa seigien quels onns dapli che vargai.

Differents defects

Sco Michael Spescha di, hagi ei dau differents defects da moduls e perquei hagi la suprastonza communala – cun in credit da 20000 francs – decidiu d’installar in niev sistem da digitalisaziun actual che corrispundi als basegns dad oz. «Cun la nova sligiaziun digitala havein nus novs moduls da LED che portan ina pli aulta qualitad. Nus quintein ussa d’haver ruaus ils proxims circa 10 onns.» Las lavurs ed igl acquist dil niev sistem dallas tablas digitalas hagien custau entuorn 17000 francs. «Cun entradas da denter 10000 e 12000 francs per onn vegn quella investiziun ad esser pagada enteifer dus onns e suenter ein las tablas puspei rentablas», di Michael Spescha.