Stafla dus da l’ultim rumantsch

Bunas novas per ils fans da la seria dad RTR «L’ultim rumantsch»: i dat ina segunda stafla. E cun quai che la emprima preschentaziun uffiziala – la premiera è a chaschun dal ZFF, il festival da film a Turitg – è gia vendida ora, datti anc ina segunda pussaivladad da vesair l’entira segunda stafla en ina tratga, als 2 dad october, era en il rom dal ZFF. Quai communitgescha il ZFF en sias medias socialas.

Dad ina surpigliada da l’affar enfin Genua

Uschia sco che RTR communitgescha, vai era en la segunda stafla da L’ultim rumantsch principalmain per las dispitas da la famiglia Durisch che posseda e maina la pli gronda chasa da medias dal Grischun e per l’ideologia da Ladina Durisch (giugà dad Annina Hunziker). Ella è l’ertavla e la scheffa da l’ultima gasetta rumantscha, la «Posta». Dentant che Gion Durisch, giugà da Marco Luca Castelli, zuppenta ils problems finanzials da la chasa da medias publitgescha sia nezza Ladina Durisch artitgels che mussan praticas dubiusas da famiglias grischunas. La mamma da Ladina, Andrietta, giugada era en la segunda stafla da Marietta Jemmi, emprova d’ina vart da salvar il num da la fatschenta da famiglia e da l’autra vart da carmalar enavos en il manaschi sia figlia Ladina. 

Pervia dal nausch management da Gion Durisch crodan ora las maschinas da stampar en la chasa da medias ed uschia vegn l’entira fatschenta en ina situaziun precara. In conglomerat da medias ester smanatscha da surpigliar la chasa da medias pervia dals problems finanzials.

Gion Durisch ed Andrietta Cadonau èn occupads cun il manaschi durant che Ladina scuvra in secret da famiglia. Ensemen cun Corsin, giugà da Noam Jenal, ch’è stà schefredactur da la «Posta», cumenza ella a far retschertgas che als mainan enfin a Genua.  

L’istorgia va vinavant, ils collavuraturs restan

Tut las acturas ed ils acturs ch’eran da la partida en l’emprima stafla da L’ultim rumantsch han era giugà lur rollas per la segunda stafla. Uschia ves’ins puspè ad Annina Hunziker sco Ladina e Marietta Jemmi sco Andrietta Cadonau, la mamma da Ladina. Marco Luca Castelli gioga a Gion Durisch e Noam Jenal è Corsin, l’anteriur schefredactur da la «Posta». En ulteriuras rollas èn tranter auter da vesair Andreetta Nogler, Felicitas Heyerick,Catriona Gugenbühl, Roman Weishaupt, Gina Estrada, Tim Theus e Nikolaus Schmid.

Era la segunda stafla da la seria è producida en tschintg parts. Responsablas per la producziun èn Sophie Toth ed Aminta Iseppi da l’interpresa shining nice da Turitg en coproducziun cun Manuel Sieber da l’interpresa schau. GmbH da Cuira. La reschia ha era puspè Adrian Perez manà ed Aaron Markus Graf era sco gia en l’emprima stafla responsabel per las lavurs da camera. Ils scenaris èn vegnids sviluppads en il Writer’s Room dals auturs Adrian Perez, Jen Ries e Simon Nagel.