La prüma sted in nos nouv dachesa

Ils prüms gün es gnieu il mumaint: nus vains banduno la cited ed ans vains finelmaing drizzos aint in nossa nouva chesa in champagna. Que es sto ün grand, ma fich bel müdamaint.

As sdasder cun il chaunt dals utschels impè da la canera dal trafic, baiver üna tazza da cafè sülla veranda intaunt cha’l sulagl alva sur il god. Quists mumaints quiets sun dvantos svelt nossa nouva rutina. Üna vouta cha las s-chaclas sun stedas svödedas e cha nus vains imprais a cugnuoscher ils chantunais, ho que cumanzo a parair scu dachesa.

Düraunt la sted vains tschernieu ün ritmus constant per lavurer mincha di ün pêr uras. Tschertüns dis vainsa scuviert sendas e pruno laina, oters dis vainsa fat pitschnas lavuors da renovaziun vi da la chesa, preparo ün terrain plat in vicinanza da la chesa per pudair fabricher l’an chi vain üna garascha ed üna remisa, u simplamaing imprais a druver üsaglias cha nus nu vains auncha mê piglio in maun. Nus vains natürelmaing fat sbagls, ma eir acquisto cumpetenzas, survgnieu curaschi e bger barbagiat.

Nus vains scuviert bels lejs per nuder u fer stand-up paddle, vias per ATV chi traversan la regiun e bains cun prodots fras-chs directamaing dals champs. Minch’eivna vainsa fat ün’otra activited, minchataunt sulets, minchataunt cun amihs u famiglia chi ans sun gnieus a visiter.

La sted in quista part dal Québec ho però eir üna vart main agreabla: ils insects. Da la fin da meg fin la fin da lügl vegnan oura massa mus-chins e muos-chas da tuottas sorts. Chi chi passainta temp cuour stu esser bain preparo. Eau d’he realiso svelt cha eau sun specielmaing populera per els. Quels muos-chins haun grand plaschair da me. Eau stögl dir cha eau d’he sviluppo üna stima per l’avuost e’l settember, cur cha’d es auncha chod, ma ils mus-chins pü s-chars.

Sandra Demonti è creschida si a Zuoz. Ella è proprietaria dad ina scola da sfunsada a Bali en l’Indonesia, viva entant en champagna en il Québec en il Canada.

Ün dals pü bels plaschairs quista sted es sto da pudair partir quist lö cun famiglia ed amihs. I d’eira adüna ün plaschair da scuvrir insembel la regiun, da preparer ün bun past, fer ün fö in üert e guarder las stailas. Nus vains passanto bgeras sairas cun rir ed in buna cumpagnia.

Eir la fauna es üna part fascinanta da la vita in champagna. Nus clappains regulermaing visitas dad utschels da tuot gener, squigliats, galdiners sulvedis, leivras, chavriöls, vuolps e rizzas grandas scu ch’eau nu d’he auncha mê vis. Nus ans stuvains auncha adüna adüser landervi dad esser spectatuors in prüma lingia illa rapreschantaziun da la natüra.

Nus guardains inavous cun ün cour plain sün nossa prüma stagiun cò. Ad es sto üna sted da scuviertas da nos terrain, da nossa regiun, da noss limits e dal ritmus d’üna vita pü quieta. Nus vains imprains da metter in equiliber lavur e plaschair, da piglier las robas proget per proget e pizch per pizch da mus-chins.

Uossa cha las föglias cumainzan a gnir cotschnas e l’ajer pü fras-ch, ans preparains per l’inviern. La stagiun chi vain purtaro sias egnas lecziuns e bellezzas, ma quista sted ho miss la fundamainta. Ella ans ho inrischos cò, na be cul corp, ma eir cul cour. Nus essans precis lo, inua cha vulessans esser.