Dar ballapei sin granulat da badugn

Ils representants dalla vischnaunca, dalla Uniun sportiva Schluein/Glion (USSI) e dallas firmas da construcziun participadas han dau gliendisdis endamaun l’emprema palada per la nova plazza da ballapei da Glion che secatta dadens il bogn Fontanivas. Il terren sut il pastget artificial vegn emplenius cun granulat da badugn. Igl ei l’emprema plazza en Svizra realisada cun il tal granulat.

«Niev tier nus – mo secumprovau egl exteriur»

Thomas Müller, il president dalla USSI, ha argumentau a caschun dall’emprema palada, daco che l’Uniun sportiva Schluein Glion ei sedecidida per quella soluziun. «L’applicaziun dil granulat da badugn s’auda tier las innovaziuns las pli actualas sil sectur dalla construcziun da plazzas da sport. Nus essan fetg engrazieivels che nus survegnin la pusseivladad da baghegiar il plaz cun quei material.»  Ella communicaziun allas medias scriva la USSI ch’ellas ellas tiaras dall’Europa dil Nord seigi il diever dil granulat da badugn secumprovaus ed en installaziuns da test a Sheffield ell’Engheltiara seigi quei material vegnius taxaus sco fetg adattaus.

Senza microplastic

Gian Arpagaus, il menader dil project a Glion Fontanivas ha detg che la USSI realiseschi sin quei sulom ina plazza da ballapei sco soluziun dureivla che perschuadi ton pil sport sco era ord il pugn da vesta ecologic. «Il granulat da badugn ei neutrals al clima e cumplettamein decumponibels», ha Gian Arpagaus detg. «E  percass ch’ins drova buca pli il plaz artificial san ins returnar il material alla natira e cunquei alla circulaziun naturala.» La plazza da ballapei orda granulat da badugn adempleschi las pretensiuns per ina buna qualitad da giug, eisi vegniu detg duront l’emprema palada. Quellas plazzas seigien renconuschidas dalla FIFA e sappien vegnir duvradas ton pil sport da massa sco era pil sport d’elita.

Tierm impurtont per l’USSI

Ils responsabels dalla USSI han era accentuau duront igl act da partenza per la construcziun ch’il niev plaz a Glion munti in tierm impurtont pil Club da ballapei Schluein-Glion e per la vischnaunca Ilanz/Glion. La USSI seigi la pli gronda uniun da sport dalla regiun che creschi ad in crescher. Ins drovi urgentamein il plaz e survegni a Glion ina plazza da ballapei che sappi vegnir duvrada igl entir onn.

Glion vegni ad esser ina basa da trenament impurtonta per l’uniun e per las equipas da junioras e da juniors dil Team Surselva sco era per la Federaziun grischuna da ballapei. Gian Arpagaus: «Cul plaz artificial modern vegnan las cundiziuns per trenar e giugar megliuradas considerablamein ed ei vegn creau novas pusseivladads per promover la generaziun giuvna ed il sport da ballapei.»

Vischnaunca satisfatga

La vischnaunca dad Ilanz/Glion sustegn la construcziun dil plaz cun ina contribuziun  considerabla da 600 000 francs plus ina garanzia da deficit da 100 000 francs. Il president da vischnaunca da Ilanz/Glion, Marcus Beer, ha detg che la nova plazza seigi ina grondiusa cumpletaziun dils stabiliments da sport gia existents a Fontanivas.

Investiziun egl avegnir

Il niev plaz da ballapei orda granulat da badugn a Glion Fontanivas cuosta tenor preventiv 1,7 milliuns francs. Suenter differentas contribuziuns da susteniment dalla vischnaunca Ilanz/Glion e dil Cantun restan aunc cuosts da 500 000 francs per l’USSI.

Ella communicaziun da medias da l’uniun stat ei scret che l’uniun sportiva sappi strusch finanziar quella summa senza prestar lavur cumina per 200 000 francs e senza survegnir ulteriuras contribuziuns. Il meinaproject Gian Arpagaus ha era engraziau als numerus voluntaris per lur agid cun baghegiar il mir da basa per la tribuna d’aspectaturs.