«In temps intensiv e pretensius»

«Enzacu ston ins schar ir, schar liber.» Cuort avon la prova principala e la premiera ein las pusseivladads dil reschissur d’intervegnir restrenschidas. Quei sa secapescha era il reschissur dil musical Plaun Salter, Flurin Caduff. «Jeu sai aunc dar tscheu e leu in tip ni plazzar ina ni tschella remarca.» Autruisa ei il reschissur cunscients che giugaduras e giugadurs ch’ein medemamein cantaduras e cantadurs san tgei ch’ei da far. «Bia caussas sedattan tuttenina da sesez.» La gievgia, ils 2 d’october 2025 ei la prova generala. «Nus vegnin per l’emprema ga a giugar avon publicum.» Ina impurtonta experienza per acturas ed acturs ch’augmenta segir la concentraziun. Els fan persenn ch’igl ei plaunsiu serius dus gis avon la premiera dils 4 d’october 2025. Enqual incap alla prova generala augmenta la concentraziun per la premiera, ei empau la devisa ella scena da teater. Il reschissur da Plaun Salter ha sco ei para pauc gust sin incaps. «Jeu vai suenter las davosas provas tuttina bugen, sche la prova principala gartegia.»

Trer ils fils

Per tut las persunas involvadas ell’organisaziun ed el giug da Plaun Salter va cun la premiera ina intensiva fasa a fin. Quei vala tonpli per il reschissur che trai ils fils en caussa. Sper la lavur da reschia ei Flurin Caduff aunc involvaus en biaras discussiuns e decisiuns che pertuccan igl entir project. «Igl ei stau in ordvart pretensius ed intensiv temps.» Tonpli perquei che Flurin Caduff gioga aunc sez ina rolla principala el giug musical da Plaun Salter. Quella situaziun valetescha el denton strusch per disavantatg. «Igl ei magari buca schliet sch’ins sesanfla sez amiez il giug e sa aschia dar tscheu e leu in tip e curreger.» Quei ch’ei magari vegniu alla cuorta ei la concentraziun sin l’atgna rolla. «Grazia a mia experienza che jeu hai sin tribuna sai jeu cumpensar per part quei disavantatg.» Empau sutschazegiau ha Flurin Caduff las liungas pausas denter las provas. «Magari ein caussas idas en emblidonza tier acturas ed acturs ella fasa denter ina prova e l’autra.» Sco cantadur ed actur professiunal ei Flurin Caduff disaus d’exercitar intensivamein duront 5 jamnas entochen tier la premiera. Satisfatgs ei il reschissur dalla motivaziun e digl engaschi dils affons sin la tribuna da Plaun Salter. «Cul temps enconuschan e san els schizun il text dils carschi.»

Tempra da teater en halla polivalenta

Bia lavur, engaschi ed era daners han ils oganisaturs dil musical da Danis investau ell’infrastructura. Midar la tempra dad ina halla polivalenta communala en in ambient da musical ei buc aschi sempel. «Nus vulein che las aspectaturas ed ils aspectaturs sentan gia cun entrar en sala igl ambient dil musical.» Buca meins che 100 000 francs han ils organisaturs investau ella tecnica ed ell’infrastructura. «Nus havein giu grond agid dalla vischnaunca e dils luvrers communals.» Dabia discussiuns ed emprovas hai  dau entochen ch’il giug ei sepresentaus ella glisch giavischada. «Quei ha caschunau dabia stentas supplementaras.» Flurin Caduff puntuescha che mintga plaz sin la tribuna d’aspectaturs porschi egliada libra sin la tribuna e sil giug. «Ei ha aunc plaz a disposiziun per la premiera», puntuescha il reschissur che regorda era alla buna purschida culinarica agl ur dil musical. El spera secapescha sin retschas serradas la sonda proxima. Beinsavend che suenter la premiera ei la reclama da bucca tier bucca la megliera reclama. Las reservaziuns ein en scadin cass empermettentas.