300 nursas e prest diesch gedas tants visitaders

Per la 22avla geda ò l’Uniun purila Alvra e Val Surses Savognin Beiva Turissem anvido sonda passada giasts ed indigens alla Tundeida a Savognin. Antschet igl 2003 scu pitschna occurrenza è la Tundeida dad onn ad onn s’avanzada ad en magnet turistic e dall’agricultura. An pacs onns è la Tundeida stada ancunschainta betg angal aint igl Grischun, mabagn er ordvart chel.

La raschung è tgi igls meds da massa on rapporto an pled e maletg dall’occurrenza, ella tg’ò adegna li l’amprema sonda digl otgover. Li ò la Tundeida a Savognin adegna aint igl quartier Grava, chest onn dantant betg segl plaz da scola ed anturn chel. Igl muteiv è tgi da preschaint ins è vedlonder cun la construcziun dalla nova scola, uscheia tgi la gronda part digl plaz è betg stada a disposiziun agls organisatours dalla Tundeida.

Ad Otmar Netzer, igl anteriour pour da Savognin, e president digl comite d’organisaziun dalla Tundeida, cun las persungas tgi appartignan er a chel è tuttegna reuschia da cattar aint igl quartier Grava l’egn u l’oter bel cantung, en’antgerna singulara ed ena giassa adattada per realisar la 22avla ediziun dalla Tundeida. Igl antier areal dall’occurrenza era pi cumpact e pi unia

Strousch diesch minutas

Aint igl center dall’occurrenza èn er chest onn sa tgapescha stadas las nursas. Igl intent tg’ins ò avant passa 20 onns introduia la Tundeida cun l’inizianta Lucia Netzer-Peduzzi è sto da mussar tge tgi sa lascha tot far cun langa-nursa, tg’ins so trer a nez chella ed er tgi products da langa-nursa ed er oters tg’on an ena moda u l’otra da far ensatge cun la nursa sa vendan bagn ed èn er dumandos.

Gnond da son Mitgel e cun traversar igl Punt Crap èn las passa 300 nursas neidas beneventadas d’en pievelung. Betg tottas 300 nursas on alloura cuntinuo lour «parada»  an direcziun dalla baselgia da Nossadonna cun bung 40 tocs eir agl li noua tg’ellas èn neidas tundeidas, chegl gist dasper la Tgesa Amilcar, egn digls pi ancunaschaints bietgs da Savognin. Per tonder ena nursa ò igl tundader Nicola da Mesocco gia strousch diesch minutas. El ò fatg la sia lavour cun bler anschign, cun grond adatg, cun ena professiunalitad ed er cun ena calmezza admirabla. Assistia è igl tundader nia da Domenic Netzer, el cun corp ed olma pour da nursas.

35 stands

Gio dei avant tgi las 300 nursas èn passadas Grava era ena rotscha gliout gio segl plaz dalla Tundeida. Alla fegn finala èn chegl sto tranter 2500 e 3000 persungas, detg oter prest diesch gedas igl domber dallas 300 nursas. Chegl tgi pertotga igl domber digls stands eran chegl 35 tocs, tants scu ple u manc aint igl rom digls davos onns.

Patrick Thurner tgi appartigna er agl comite d’organisaziun è dantant cuntaint tgi tants expositours ed expositouras èn nias cun lour products alla Tundeida. El fò er ena bilantscha positiva chegl tgi pertotga la vendita da products e dalla roba tgi dat betg gist da cumprar ainten mintga buteia. Ple tgi cuntaint è el tgi l’ora è stada ampernevla e naturalmaintg tgi la Tundeida ò eneda daple attratg en schi grond public a Savognin.

Realitad è bagn er tgi l’occurrenza è betg angal la Tundeida, mabagn er ena fiera. Far venal, vender e preschentar lour products, roba da langa-nursa ed artisanat dastgan angal persungas indigenas tgi stattan ed on dimora ainten la regiun Alvra.

Er sonda passada è chegl sto igl cass. Galdia ò igl public sa tgapescha er las purscheidas lateralas, scu per exaimpel las producziuns da musica, la demonstraziun digls tgangs da nursas, la biblioteca, la Sala Segantini e tot las bunas tratgas tgi dava da ples travagls dalla gastronomia.

Bleras infurmaziuns davart las nursas, tigls products indigens, dalla regiun, digl turissem e dall’agricultura on visitaders e visitaders retschet da Flavio Sterli, el tg’ò fatg chegl an moda simpatica ed instructiva scu gio tar las davosas ediziuns dalla Tundeida. Sa musso è er sonda passada tgi cun en’organisaziun perfetga, cun porscher a giasts ed indigens en’occurrenza tgi sa disfranztgescha da bleras otras, da metter en animal aint igl center e da vender products spezials vign la gliout an rotscha e chegl er schi la Tundeida ò gia li per la 22avla geda.