Drama e tensiun sil Plaun Salter

Treis onns suenter la presentaziun dil musical Frisal-Frisal ei Danis-Tavanasa puspei il liug d’in grond musical: Plaun Salter. E sco avon treis onns eis el sut l’egida da La Compagnia Rossini. Armin Caduff, il tgau dalla compagnia, ha scret e cumponiu il musical romontsch Plaun Salter che ha giu premiera la sonda sera. Siu fegl Flurin ha menau reschia ed ei da veser sin tribuna en ina dallas rollas principalas, quella digl emerit.

Simbiosa dinamica

Pli che tschien persunas s’engaschan pil musical, seigi davos las culissas, egl orchester, il chor d’affons e dils carschi ni en ina ni l’autra rolla d’actura ed actur sin tribuna. Ad Armin Caduff eis ei reussiu da formar in’unitad cun giuven e vegl, pign e grond, laics e professiunals, coreografia tschaffonta e constums bein eligi per las singulas rollas. Ensemen sedat ina simbiosa dinamica che tschaffa il publicum e lai quel en marveglias – tgei che schabegia cul Plaun Salter – entochen la fin. La FMR ha giu la caschun d’assister all’emprova generala il venderdis sera.

Regurdientschas dil Plaun Salter

Plaun Salter ei in liug buca lunsch naven da Danis-Tavanasa. Savens nezegian ils indigens il tschancun entochen leu per ina spassegiada e per guder leu il ruaus. Biaras e biars colligian era regurdientschas – per exempel dall’affonza – cun quei liug, aschia era Armin Caduff. Quellas regurdientschas han intimau el da scriver ina historica dil Plaun Salter ed il resultat da quella lavur ei in musical. «Per mei ei Plaun Salter adina stau era empau in liug magic e sco affon s’imaginavel jeu che bia crappa e greppa sappi saltar e seigi striunada leu», di Armin Caduff. Quels misteris dil plaun dado Danis lai el reviver el musical romontsch.

Gerau Conrad e sur Giachen

L’entschatta dalla historia vegn fatga sil plaz da Laradira el vitg, nua che l’idea da vender Plaun Salter pren tec a tec conturas. Gerau Conrad (David Flepp), il giuven canzlist Carli (Mattiu Albin) e sur Giachen (Claudio Simonet) molan vid ils detagls dalla vendita. Ed in’emprema ga vegn era igl emerit (Flurin Caduff) en acziun. Cheu s’annunzian lu era pliras persunas che s’interessechan pil Plaun Salter: Donna Friselli (Anika Defuns) ch’ei directura dalla Banca dil Vatican, Lady Wilson (Maria Catrina Albin-Caduff) ch’ei possessura dall’interpresa Wilson a Londra e Luzia Vonlanthen (Cornelia Deplazes), in’anteriura habitonta dil vitg e milliunara. Ils indigens denton – surtut il purs – ein buca fetg incantai dalla vendita dil terren.

Puorla misteriusa

Gerau Conrad vesa la gronda fatschenta e sur Giachen vesa la vendita sco gronda schanza per recaltgar ils mieds finanzials per baghegiar ina baselgia nova e pli gronda. Mo ussa vegn igl emerit en funcziun e cun puorla misteriusa dat el ina viulta a tut ils plans e desideris. Ils purs da lur vart emprovan da spuentar las interessentas dil Plaun Salter cun fried da ghella – tut quei encunter la veglia da gerau Conrad e sur Giachen. Tuttina insistan els sigl ingant e la fin finala culminescha la historia ad act dramatic, inscenaus digl emerit.