«Ei ha bunamein alzau il tetg dalla halla»
Il tierz Festival da la chanzun rumantscha ei a fin. Il president dall’uniun organisonta, Clau Scherrer da Trun, tila ina bilanza ordvart positiva da quel. La FMR ha discurriu cun el.
FMR: Clau Scherrer, varga 2000 persunas han gudiu il tierz Festival da la chanzun rumantscha a Vella ni sil livestream da RTR. Tgei bilanza targis Vus dalla fin d’jamna?
Clau Scherrer: Nus essan fetg satisfatgs e cuntents cugl interess dalla glieud. La fascinaziun digl auditori ha entschiet cun concerts d’aulta qualitad dils affons e da rock e pop il venderdis sera. Fetg simpatica ei la sentupada da cant per famiglias stada la sonda avonmiezdi e la concurrenza da cumposiziuns ei sesplegada fetg bein. In accent ha Ruedi Lutz dau cun sia cumposiziun «Gis da maina murir» cun text da Claudio Spescha. Cun siu cuntegn tucca el il temps ed intimescha da cantar encunter las crisas. Igl eveniment dalla natira a Blatten ha intimau el a quella canzun. Cul diember da 45 cumposiziuns essan nus medemamein fetg cuntents. En quels treis festivals ha ei pia dau 132 canzuns novas. Al concert da gala dalla sonda sera ei la halla stada pleina pli che pleina. Igl ei stau in’atmosfera che ha bunamein fatg alzar il tetg dalla halla a Vella.
Pil festival a Vella ha ei dau duas novaziuns: Ina concurrenza per cumposiziuns per chors da dunnas ed in chor da festival. Duas novaziuns cumprovadas?
En mintga cass. Cul chor da festival havein nus vuliu remplazzar ils chors che cantavan las canzuns da concurrenza. Aschia ein tuts tocs vegni presentai ella medema cumposiziun e probabel eis ei aschia era stau pli sempel pil publicum da cumparegliar ils tocs. Il chor da festival ei s’entupaus a tschun exercezis naven dil zercladur. Sapientivamein havein nus vuliu mo paucs exercezis, pertgei ei duei ir tgunsch d’exercitar e da cantar las canzuns novas.
«Il festival duei dar colur allas atgnadads dalla regiun e duei era esser in arranschament per quella.»
Clau Scherrer, president dall’uniun organisonta
2028 leis Vus organisar il proxim festival, quei ei decidiu. Savess ei dar midadas en vesta a lez?
Quei dependa dil liug. Nus organisassen bugen il quart festival el Grischun Central ni en Sutselva. Il festival duei dar colur allas atgnadads dalla regiun e duei era esser in arranschament per quella. Il festival ha denton era la finamira da dar impuls musicals ad ina regiun en ina fuorma ni l’autra. Per quei motiv eis ei il mument aunc memia grev da dir co il program savess veser ora. Ei dat loghens interessai d’arranschar il quart Festival da la chanzun rumantscha.
Gust da leger dapli?