Investiziun per sierar igl provedimaint da sanadad

Tar la viseta dalla FMR a Barvogn da dumengia passada on igls redactours antupo blera gliout, blers giasts da Barvogn e Filisour, ena rotscha indigens e numerousas persungas d’otras vischnancas dalla Val Alvra. Nias beneventadas èn tot las persungas preschaintas da Luzi C. Schutz, igl mastral digl cumegn da Barvogn-Filisour. El è sa musso tot cuntaint tgi schi blers interessos ed interessadas èn sa decidias da neir a piglier invista digl plaz da biagier dalla nova practica da medi a Barvogn. Igl mastral ò menziuno: «Anc vei betg or scu tgi pigl mez da december 2025 vess la nova practica da medi d’esser pronta per surdar agl travagl.» Anvers la FMR ò Luzi C. Schutz detg d’esser da buna speranza, tgi chegl gartegia, er schi lavours pi detagledas e pi pitschnas mantgan anc tar l’avertura.

La «Chesa Meidi» ò fatg igl sies sarvetsch

Siva da quant dei tgi dat an Val Alvra en medi è betg propi ancunaschaint. Testifitgia è tgi siva da 150 onns stat a disposiziun ad indigens e giasts en sarvetsch medical. Igls bungs onns digl hotel Bogn d’Alvagni igl mez digl 20avel tschentaner e digl «Kurhaus» a Barvogn era igl medi da Barvogn er a madem mument medi da cura. Avant 55 onns ò la Cassa da malsangs circuitala Barvogn biagia la «Chesa Meidi», ainten la quala las practicas da medi digls dus medis actuals Domenic Ganzoni e Dominik Utiger sa cattan anc oz. Igl bietg è nia ainten igls onns e da porscher en sarvetsch medical conform agl taimp dad oz è strousch ple pussebel. Igl cumegn da Barvogn Filisour, cun la populaziun, cun persungas digl rom e cugl dus medis Domenic Ganzoni e Dominik Utiger èn alloura nias a la conclusiun da far or dalla halla da gimnastica dalla scola existenta ena nova practica da medis. L’ideia ò catto davart dalla populaziun digls dus lis vaschigns, ma er da blers oters indigens dalla Val Alvra en fitg bung resung e cunzont er da blers giasts. Igl matg 2024 on votantas e votants delibero unanimamaintg e cun 133:0 vouschs igl credit da treis milliuns per chel project. Da chels treis milliuns francs vignan dus milliuns investias ainten la practica da medi ed en milliun francs per la sanaziun energetica digl bietg cun la localitad dalla scoletta e las localitads da scola dalla 1. e 2. classa.

Per mobigliar ed indrezs è betg igl cumegn responsabel

L’investiziun seia en grond zap aint igl avigneir digl provedimaint da sanadad locala, ò detg Luzi C. Schutz. Gist ainten las muntognas ed ainten lis alla periferia dovrigl er en sarvetsch medical garantia. Investia vegia igl cumegn da Bravogn Filisour chella gronda somma er cun saveir tgi en de ins vegia da dar a fit la practica da medi a forzas pi giovnas cun eir igls dus medis Domenic Ganzoni e Dominik ­Utiger an varsaquants onns an pensiun. Da dar a fit ena practica da medi moderna seia bagn pi simpel, ò managea Luzi C. Schutz. Igls dus medis Domenic Ganzoni e Dominik Utiger peglian a fit la practica da medi ed er las localitads tg’els dastgan dar a tschains a sublocataris. Igls dus medis investeschan sez chegl tgi pertotga igl mobigliar, tots igls indrezs medicinals, tgossas tecnicas ed apparats tgi totgan tiers ena practica da medi. Las localitads dalla nova practica da medi, scu la recepziun, las stanzas da consultaziun, la stanza d’urgenza, igl labor, la stanza da radiografar ed er l’apoteca on grondas fanestras, chegl tg’è en aspect simpatic. Scu tgi Luzi C. Schutz ò detg ins vegia risguardo per realisar chel project per gronda part firmas dalla regiun u er fatschentas indigenas.