Navonta Toyotas ella centrala da Vuorz

Ell’anteriura centrala dall’Ovra electrica sursilvana sper la staziun da Vuorz dat ei dapi 2019 in museum d’autos. Il specialist da reclama Peppe Conrad ha realisau ensemen cun entgins amitgs il Swiss Toyota Museum cun ina collecziun da circa 90 autos dalla marca Toyota.

parter

Il museum da Toyotas a Vuorz dat ei dapi sis onns. Il specialist da reclama ­Peppe Conrad che lavura a Laax e viva a Domat ha iniziau il museum ensemen cun entgins amitgs.  Duront ina guida el museum raquenta el che ses geniturs havevien contacts culla famiglia da Luzi Janki permiert che luvravi ella centrala electrica da Vuorz e che habitavi dasperas cun sia famiglia. «Cura che nus havein encuretg in liug per exponer ils Toyotas, ei la centrala da Vuorz vegnida endamen a mi ed jeu hai contactau la Repower SA sco possessura dalla centrala», di Peppe Conrad.

«Nus havein saviu cumprar l’immobilia ed adattau ella per nies scopo.» Ils davos  sis onns ha la gestiun dil museum che senumna STM Classics GmbH augmentau cuntinuadamein la purschida d’autos  construi suenter la Secunda Uiara mundiala el Japan. «Sper ils pressapauc 90 Toyotas che nus presentein, organisein nus era differents events.»

Autos da persunas da sport e da lavur

Tut ils vehichels exponi a Vuorz ein duns ad emprests. L’entira collecziun d’autos ei representada el museum, naven d’autos pigns culants, autos da sport, da famiglias, da luxus entochen a vehichels campesters, bus da campar e prototips rars. Il pli vegl auto datescha dil 1958, il pli niev digl onn 2020. Il schef dil museum Peppe Conrad explichescha mintga model cugl onn da construcziun ed il diember da seria. El declara ils motivs ch’ins ha construiu ils differents models da Toyota e daco che la roda da menar ei tier in exemplar da vart dretga e tier in auter da vart seniastra. E secapescha che Conrad ei era documentaus tochen il pli davos detagl cun l’historia tecnica da mintga Toyota. In exemplar che fa parada a Vuorz ei ina limusina da luxus nera che vegn producida mo per l’elita dil Japan. Igl ei in auto che cuntegn perfin sezs da massascha sils plazs davostier.

«Nus havein per exempel ina sentupada ­regulara d’in club che vegn per beiber in aperitiv ni era per tschenar ­enqualga ensemen.»

Peppe Conrad, menader dil museum da Toyotas a Vuorz

Dapli che mirar autos

Ils davos onns hagien el e ses partenaris dil Swiss Toyota Museum ponderau co ins savessi augmentar la purschida dil museum. «Actualmein essan nus vidlunder da construir ina lounge sur la halla d’exposiziun. Quella lounge sa vegnir duvrada per arranschaments sco sesidas, radunonzas e fiastas.» Davos la halla d’exposiziun – avon ch’ins va dalla scala rodunda siado en la secunda halla d’exposiziun – secatta ina bar e sper quella ina meisa da magliar. Tenor il menader dil museum vegn quei local duvraus per sentupadas societaras. «Nus havein per exempel ina sentupada regulara d’in club che vegn per beiber in aperitiv ni era per tschenar enqualga ensemen. Tscheinas semplas sco grilladas fagein nus sezs e pasts pli gronds organisein nus via catering.»

Biblioteca e tocca da reserva

Il Swiss Toyota Museum a Vuorz ha er ina biblioteca, secapescha ina biblioteca cun litteratura da Toyotas. Sco quei che Peppe Conrad di, vegli il museum denton era porscher tocca da reserva per Toyotas sco quels che seigien exponi. «Nus restaurein era Toyotas. Quei fagein nus ensemen cun garaschas che nus enconuschin.» Pertuccont ils prezis dils autos exponi a ella veglia centrala electrica a Vuorz di il menader dall’exposiziun che quei seigi fetg different. «Cheu dicuor’ins dad autos museals ch’ins paga entochen 20 000 francs. Ei dat denton era tals ch’ein pli favoreivels.» Quei dependi era cons exemplars ch’ei detti aunc silla fiera. Il pli stedi vegnien ils models dil Toyota Celica e dils models da Corola cumprai e vendi, di Peppe Conrad.

«Jeu vuless far dapli»

«Enteifer ils proxims dus onns mon jeu en pensiun», declara igl amatur d’autos vegls. «Jeu vuless far dapli per nies museum. Mo il mument maunca la peda a mi.» El hagi entginas ideas e quellas emprovi el da realisar ils proxims onns.


Informaziuns dat ei sin www.toyotamuseum.ch