La resca era memia gronda

Ella destinaziun Flem, Laax e Falera ei la gronda part dalla populaziun levgiada. Il resultat clar dallas treis votaziuns muossa quei. Malgrad ch’ins haveva udiu diversas objecziuns e resalvas han ils responsabels saviu perschuader las votantas ed ils votants. Ei seigi quasi ina situaziun sco ella Corea dil Nord, ha Adrian Wolf mess sil punct pertuccont l’unitad che las treis vischnauncas turisticas han mussau. Laax e Falera han votau mintgamai cun 93,2 % GIE e Flem cun 85,5 %. Igl ei denton veramein ina votaziun democratica. A Falera e Laax ha la suprastonza dumandau, sch’ei seigi giavischau scrutini. Memia paucas persunas han denton alzau il maun per sustener in tal proceder.

Sch’ins analisescha il resultat schi clar ston ins constatar che la populaziun dallas treis vischnauncas ha realisau ch’ella ei dependenta totalmein dil turissem. La tema da quei che schabegiass, sch’in Vail Resort – ni in auter concern jester – sepatrunass dil territori da skis da Laax Flem Falera survarga tut ils detagls da rescas, cundiziuns ed ulteriuras opziuns. A quella resca han las treis vischnauncas dau prioritad – ed ella ha decidiu la votaziun. Ils detagls dil «deal» han ins suspendiu: Il termin da decider ch’ei forsa staus memia cuorts, la tema che las vischnauncas sappien buca finanziar quell’acquisiziun, ch’ellas astgien buca semischedar ell’economia privata e ch’ins hagi buca publicau il contract. Quellas ed autras resalvas han votantas e votants discutau e viu. La schanza da tener sezs enta maun las hottas ed impedir in gigant jester ha giu prioritad.

Il prighel d’in Vail Resort ni d’auters concerns internaziunals ei giustificaus. Pertgei damemia ha la Svizra dau orda maun. Ina marca Flem Laax Falera fuss tuttavia lucrativa. Concerns solids svizzers han famiglias proprietarias vendiu a concerns digl exteriur. Las sperditas semuossan pér a liunga vesta. Concerns strehan plazzas e mettan l’internaziunalitad el center.

Gest a quella tendenza han ils da Flem, Laax e Falera vuliu dar in cunterpeis. Compagnie des Alpes, Vail Resort, ni era in concern pussent dalla China, savess era el futur tuttavia acquirir las aczias dalla Arena Alva SA. La Finanz Infra SA vegn denton cun garanzia a controllar vinavon ils beins relevants pil sistem turistic. Il resultat dalla votaziun ei ord quella vesta capeivels e plausibels. In factur decisiv dil contract cullas pendicularas Arena Alva risguard’ins gnanc: Era in concern che cumprass la maioritad d’aczias dalla gestiunaria stuess sesuttametter allas cundiziuns dil contract. Il contract che vegn suttascrets ussa garantescha 300 gis da menaschi pils implonts da transport sil cuolm. Enzatgei che secapescha buca da sesez.