L’Uniun Skateline Alvra vegn schliada

A la radunanza da commembers da gievgia saira passada ha l’Uniun Skateline Alvra prendì la decisiun da princip da schliar l’atgna uniun. Sco quai ch’il cassier Luzi Schmid ha ditg envers RTR suenter la radunanza, duess quel process esser terminà il pli tard en dus onns e cuntegnair la liquidaziun da tut la facultad. Vul dir, l’uniun vuless anc vender la gronda part da ses inventari: var 300 patins, ina maschina da far glatsch, las cassas e trais bus per transportar la glieud. Il cassier spera ch’ins possia grazia a la vendita finanziar anc la reconstrucziun da la patinera.

Ils giuvens mancan

Il motiv principal per quest pass da schliar l’uniun èn tenor la suprastanza las difficultads adina pli grondas da chattar novs commembers e gidantras voluntarias. Las commembras ed ils commembers da fundaziun hajan en il fratemp tranter 75 ed 80 onns, e forzas pli giuvnas na sa mettian strusch a disposiziun. Luzi Schmid deplorescha il pass da la liquidaziun: «Nus ans essan engaschads plirs onns cun corp ed olma per la Skateline Alvra. Ma l’interess per surpigliar responsabladad è simplamain memia pitschen.»

Engrevgiantas sajan vegnidas las cundiziuns giuridicas en il spazi d’auas, regulativs che han rendì supplementarmain pli cumplitgà il manaschi dal vial da glatsch. Uschia ha tranter auter era stuì vegnir dismessa ina pitschna pizzaria tar l’arrivada da la skateline a Surava.

«Jau pudess cridar!»

La Skateline Alvra, che sa chapiva adina sco project senza finamira da far gronds gudogns, viveva fermamain da l’idealissem da sias commembras e da ses commembers. Ils pretschs d’entrada èn restads durant tut ils onns medem auts. Suenter in punct culminant l’enviern 2019/20, cun var 27 000 entradas l’onn avant la pandemia da corona, è l’interess vi da la skateline dentant tschessà ferm.

Per il «bab» da la Skateline Alvra, Giorgio Bossi, è la fin da la pli lunga patinera en Svizra ina frida persunala, sco ch’el ha sincerà envers RTR en occasiun da la radunanza da gievgia: «Igl è in di fitg trist per mai, jau pudess cridar!» Giorgio Bossi (82) aveva presidià sur plirs onns l’uniun ed aveva lura stuì chalar per motivs da sanadad. E perquai ha el ditg gievgia: «Jau hai realisà questa Skateline Alvra e lavurà per quella, ensemen cun blers gidanters. E perquai fai simplamain mal a vesair ussa la fin da la patinera.»

Malgrà sustegn – nagin futur

Malgrà il sustegn da las organisaziuns regiunalas da turissem e da differentas vischnancas n’han ils ultims onns betg mussà en ina direcziun, nua ch’ins pudess far quint cun avunda persunal ubain ch’i dess ina soluziun solida per cuntinuar cun il manaschi.

Uschia resta la via da glatsch da trais kilometers tranter Alvagni Bogn e Surava, ina patinera ch’è serrada dapi l’enviern 2019/20, probablamain er en il futur istorgia.