Marchà bain visità
Il marchà tradiziunal da Sent ha gnü lö in sonda passada cun bell’ora e buna frequenza. Id es ün marchà chi preschainta dasper quai chi vain sport a blers marchats eir frütta e verdüra our dals üerts indigens.
Il marchà da Sent ha tradiziun e vain organisà pel solit al principi d’october sülla plazza immez cumün circundà da chasas engiadinaisas cun per part culmainas sentinras. Üna plazza predestinada per talas occurrenzas chi vain serrada pel trafic dürant festas ed evenimaints. Martina Vital da Sent es l’organisatura dal marchà.
Ella ha tradi in sonda passada ch’ella fetscha quai fingià daspö set ons: «Eu n’ha surtut quista lezcha avant set ons da Nadia Demonti chi ha organisà il marchà da Sent dürant divers ons.» Ella ha implü dit cha quist on sajan da la partida 29 stands implü set stands dad uffants. «Pels uffants esa adüna reservà plazza, pels oters expositurs vaina minchatant ün pa stret.» Sco ch’ella ha dit spordscha la plazza üna surfatscha limitada e l’auto da posta sto avair eir dürant il marchà plazza per passar tras cumün. Ils expositurs pajan pro stand 25 francs ed ils uffants expuonan gratuitamaing. «Las entradas dal marchà vegnan missas a disposiziun ad instituziuns chi sustegnan a glieud a la quala chi nu va uschè bain sco a nus», ha Martina Vital orientà.
Il marchà da sonda passada ha gnü lö cun bell’ora, es stat bain visità ed ha pisserà per baderladas animadas tanter glieud da cumün, giasts e glieud da la regiun.
Gust da leger dapli?