Lectura Rumantscha
FMR
Sche jau n’hai betg gist da leger in superinteressant cudesch, taidlel jau il pli gugent ils discurs dad autras persunas en il tren. Ed uschia vai era a Linard Candreia.
Tren I – il biro mobil
Linard Candreia numna il tren ses biro mobil, perquai ch’el scriva fitg bler cura ch’el è da viadi. Ma atgnamain è il tren betg be ses plaz da lavur, mabain er inspiraziun per ses texts, per exempel quels ch’el scriva per l’emissiun «Impuls» dad RTR. La FMR ha tschantschà per telefon cun Linard Candreia sur da ses nov cudesch «Observaziuns» – ina schelta da ses «Impuls» – e sia motivaziun da scriver, entant ch’el era – natiralmain – gist da viadi en il tren.
Tren II – far savens diever dal traffic public
La cussegliera guvernativa Carmelia Maissen ha preschentà cun ils responsabels dal traffic public grischun la gievgia passada las midadas da l’urari. L’occurrenza ha gì lieu aposta a Glion, perquai che surtut il traffic public da la Surselva profita da las midadas d’urari, surtut cun in nov tact da mes’ura. Per ch’il traffic public cun viafier ed auto da posta vegnia dentant vinavant rinforzà, ha accentuà Carmelia Maissen: «Faschai stedi diever da tren ed auto da posta.»
Tren III – betg adina la Bassa e nord-sid
Da curt è vegnì publitgà il Rapport Weidmann. Quel ha priorisà ils projects futurs da traffic da la Svizra. Il chantun Grischun è in grond perdent, cunquai ch’il rapport ha be resguardà in project en il Puschlav. Quai ha trumpà Dario Giovanoli che s’engascha gia pli ditg per ina colliaziun da tren dal Grischun in direcziun Tirol dal Nord e dal Sid. I saja temp da priorisar quella axa e betg adina projects en la Bassa ed axas dal nord al sid, di Dario Giovanoli en l’intervista cun la FMR.
A revair e bun divertiment cun la Lectura Rumantscha!
Gust da leger dapli?