En in sistem da duos pass èn 100 persunas svizras vegnidas nominadas per sa participar al cussegl da la populaziun. En in emprim pass avevan ils organisaturs tramess a 22 000 persunas in’enquista cun ina dumonda per sa participar al cussegl da la populaziun. Radund 2000 persunas s’èn alura era propi annunziadas. Ora da quellas annunzias èn 100 vegnidas nominadas, uschia che tut ils facturs demografics e la cumposiziun da la populaziun svizra eran represchentads. Las 100 persunas dal cussegl da populaziun èn dimena vegnidas tschernidas tenor vegliadetgna, gender, scolaziun, simpatias politicas, cumportament da votar, lieu e moda da viver. En trais inscunters fisics e pliras sesidas virtualas han las participantas ed ils participants discutà davart il sistem da sanadad en Svizra e decidì da s’engaschar per l’introducziun d’ina lescha naziunala da sanadad, in scumond pli rigurus da far reclama per products da nicotin e products che cuntegnan alcohol. Plinavant vuless il cussegl rinforzar las cumpetenzas per la sanadad en tut las fasas da la vita. Quest experiment scientific è in project da perscrutaziun da las universitads da Turitg e da Genevra coordinà dal Center per democrazia Aarau. Cun quest project vulessan ils responsabels examinar, sche e co che las cusseglieras ed ils cussegliers da la populaziun han ina influenza u enritgeschan debattas democraticas en l’entira populaziun. (fmr/opm)