Lectura rumantscha

David Truttmann
FMR

Legias ti questas lingias la damaun, a mezdi u la saira? Insumma, las istorgias da la Lectura Rumantscha dad oz tractan proverbis per lantschar il di fin a la lectura da buna notg.

Pudair murir en las atgnas quatter paraids

Lain dir che ti has 107 onns, pia ina flotta vegliadetgna. E lain dir che ti avessas ferm mal ed il giavisch da pudair ir … Nua lessas ti murir? Tenor ina retschertga giavischa 72 % da la glieud da pudair murir a chasa. En realitad è quai pussaivel mo a 23 % da las persunas. Co èsi dentant pussaivel d’ademplir quel giavisch a dapli glieud? Tgi po cussegliar e gidar? Da talas dumondas è s’occupada ina saira d’infurmaziun a Flem. E pelvair, era jau hai emprais intginas chaussas legend il rapport da mia collega Patrícia Tschuor-Marques.

Ils proverbis per Berna

Enconuschas ti i quest proverbi rumantsch: «Far dret a tuots nu sa gnanca nos Segner»? Sche ti fissas cusseglier u cussegliera dals chantuns a Berna, lura avessas ti gia udì ina giada quest verset. Il president da la chombra pitschna, Stefan Engler, prelegia numnadamain en mintga sessiun proverbis rumantschs. Plaschan quels a ses e sias collegas en sala? Atgnamain è quai tuttina, perquai che «far dret a tuots nu sa gnanca nos Segner.»

Cudeschs per mia maisina da notg

Tge cudesch è sin tia maisina da notg? – Mia maisina è plaina … cun var 12 cudeschs entschets e betg finids! Questa proxima fin d’emna è puspè ina chaschun per survegnir schlantsch. Ils 35avels Dis da litteratura a Cuira preschentan e discuteschan nova lectura rumantscha. Ils pleds dal co-organisatur Rico Valär dattan curaschi, perquai ch’el sa tge che «resta» mintgamai suenter il festival litterar: «Quai che resta èn ils novs cudeschs ch’ins ha lura temp durant in onn da leger – fin als proxims Dis da litteratura.» Pia, ideal per la pluna da mia maisina da notg!

Ils buns amis

E sche ti es plitost in lectur u ina lectura da prosa ­curta, lura poss jau ta cussegliar gia oz la columna dad Arnold Spescha, nua ch’i va per ils buns amis. Ils fitg buns amis.