Lectura rumantscha

Gabriela Riedi
FMR

Litteratura, litteratura e la fin anc in pau politica – quai èn las ingredienzas da la Lectura Rumantscha dad oz.

Il «poet dal cor e dal umor»

Cura che jau aud Gion Cadieli, vegn mes grond cudesch da l’Uorsin endament che va a la tschertga da la pli gronda plumpa. Ma tge scriva quella dunna pomai!, vegnis Vus a pensar, «Uorsin» ha l’Engiadinaisa Selina Chönz scrit e betg l’autur sursilvan Gion Cadieli. Ma el ha adattà il text per sursilvan, e gist quel m’ha plaschì sco buoba immens bain. Cun plima gita ha el scrit divertent e magari era fitg distatgà da l’original. Ed uschia n’èsi betg da smirvegliar ch’el vegn era numnà il «poet dal cor e da l’umor». La sonda è il vischin da Sagogn, che avess festivà quest onn ses 150avel natalizi, vegnì celebrà da radent.

Ir «pèr a pèr» cun la litteratura

Er en in auter lieu è la litteratura stada en il center, numnadamain a chaschun dals 35avels Dis da litteratura a Cuira. Il motto da l’occurrenza litterara era «pèr a pèr». Ed uschia è in grond public ì pèr a pèr cun la litteratura rumantscha, ha pudì giudair prelecziuns, performanzas e musica e schizunt persequitar ina show a la tschertga dal pèr perfect.

Betg show, mabain democrazia

Betg per tschertgar il pèr perfetg, mabain il capo (perfetg) per la vischnanca da Scuol èsi ì la sonda passada tar ina discussiun al podium. Ina candidata e trais candidats èn sa preschentads davant il public – forsa betg talmain glamurus e divertent sco ils pèrins als Dis da litteratura, però d’impurtanza immanenta per la democrazia.

A revair e bun divertiment cun la Lectura Rumantscha!