Lectura Rumantscha
FMR
Viva il pign!
Anc ans protegian cunzunt pigns da bovas ed auters privels da la natira. Pli e pli duvrassan però ils pigns sezs protecziun, numnadamain cunter la midada dal clima. Cun chaliras e sitgiras sco questa stad na vegnan questas plantas strusch a frida. Cunquai ch’i vegn tuttina pli chaud e sitg, ston ils pigns dentant baud u tard far plazza ad autras sorts plantas. Tgeninas che vegnissan en dumonda, quai perscrutesch’ins tranter auter a Tgavrouls sur Casti. Per il mument vala però anc adina: Viva il pign!
Viva la folclora!
Chalandamarz, Hom Strom ed uss era las stgargiadas – pli e pli nizzegia il turissem talas tradiziuns sco «events». Il potenzial sto en mintga cas esser grond. A Flem impunda l’organisaziun turistica numnadamain radund 50 000 francs en la stgargiada ed indemnisescha era puras e purs per lur lavur. Persuenter po il turissem quintar cun giasts e preschientscha mediala. Ord vista turistica pon ins pia concluder: Viva la folclora!
Viva la naiv natirala!
Ils territoris da skis pateschan. Nua ch’ins chattava pli baud in eldorado da naiv, frunt’ins ozendi pli e pli sin spundas brinas. Perquai èn era las Pendicularas Savognin prontas da far grondas investiziuns en l’ennavaziun tecnica. Fin 20 milliuns francs duain ils indrizs per ennavar il territori Radons custar. Anc stoppian ins dentant examinar, sche quai è insumma pussaivel e co finanziar il project. Perquai vala fin lura a Radons: Viva la naiv natirala!
A revair e bun divertiment cun la Lectura Rumantscha!
Gust da leger dapli?