Nov lieu d’inscunter per giuvenils a Cunter

En il tschaler da la protecziun civila a Cunter survegnan ils scolars e giuvenils dal Surses in nov salv per sa divertir e realisar projects. La vischnanca da Surses metta a disposiziun 53 000 francs ad onn per almain ils proxims trais onns. Manà vegn il post da giuvenils da Thomas Eigensatz da Salouf ch’ha gia experientscha cun lavurar cun giuvenils entras il sport. La plazza è dotada cun 40% e vegn organisada dal post da giuvenils Nido del Lupo d’Alvagni. Sco quai ch’il manader Fabio Botta ha ditg envers RTR saja pussaivla er ina collavuraziun cun Casti, tge che fetschia franc pli interessanta la lavur da la manadra e dal manader da la lavur da giuvenils. Il nov salv per giuvenils a Cunter pudess vegnir realisà sin il favrer da l’auter onn. Avant na saja betg pussaivel perquai che las localitads vegnan anc duvradas da l’armada Svizra durant il Forum mundial d’economia FEM. Per Giancarlo Torriani, il suprastant da la vischnanca Surses, saja il lieu a Cunter ideal, sura sa chattia ina plazza da giugar ballape e cun quai che las localitads da la protecziun civila sajan gia pli baud ina giada vegnidas duvradas da giuvenils saja avant maun ina tscherta infrastructura.

Il schef da regenza russ Dmitri Medwedew smanatscha da boicottar il proxim Forum mundial d’economia (FEM) a Tavau en cas ch’impurtanta glieud da fatschenta russa n’è betg bainvegnida là. El reagescha uschia sin in rapport da medias. Tenor in rapport da la gasetta «Financial Times» da l’emna passada sajan sin squitsch dals Stadis Unids plirs umens da fatschenta russ vegnids supplitgads da betg vegnir a Tavau il schaner 2019. Tranter auters sa tracti tenor la gasetta da dus umens cun stretgs contacts cun il president russ Wladimir Putin.