Lectura rumantscha
FMR
Las lingias grassas dad oz:
Dad A fin Z
Has ti in project dal cor, en il qual che ti investeschas uras ed uras? Tar blers e bleras è quai per exempel lur iert, lur auto u lur rimnada da cartulinas postalas! Tar il linguist rumantsch Jean-Jacques Furer è quai: in vocabulari rumantsch-franzos e viceversa! Radund 40 onns è el stà vidlunder, ha translatà tut davent dad A sco abandun enfin a Z sco zuppentar tut ils pleds dal franzos en il sursilvan e cuntrari. Dapi paucs dis è la versiun digitala dal dicziunari franzos-sursilvan accessibla per ina e scadin.
Votar cun 16 onns
Jau ma regord anc bain da mes giavischs e siemis che jau aveva cun 16 onns! Per exempel ir cun collegs empè cun la famiglia en vacanzas. U lura dad ir en sortida u dad visitar l’emprima giada l’Open Air Lumnezia! En futur duaian giuvens e giuvnas schon survegnir dretgs politics davent da 16 onns, e betg pir cun 18. Quai ha il Cussegl Grond decidì la mesemna. Tgisà, tge che il pievel vegn a decider? Dal rest: Savevas ti che il chantun Glaruna ha schon introducì ina sumeglianta lescha? La fin finala vai per la dumonda: Tgi decida, tgi che dastga decider?
Bravuogn e Surses
E sche nus essan gist tar la politica: Ils 14 da zercladur 2026 èn gea las grondas elecziuns dal Cussegl Grond. Var 500 candidats sa mettan a disposiziun. La FMR preschenta quests dis la schelta da candidatas e candidats da differents cirquits pli u main rumantschs. Oz en roda èn dus cirquits dal Grischun Central, numnadamain Bravuogn e Surses.
Bun divertiment cun la Lectura Rumantscha!
Gust da leger dapli?