La basa ei dada

(anr/ac) Il Teater giuven Grischun ha presentau il vendergis vargau siu program per igl onn 2019. Il teater vul etablir sia preschientscha ella scena da teater dil cantun Grischun. Inaga entras la cunvegna da prestaziun cun il cantun Grischun ed ina pli ferma preschientscha ellas medias socialas. Roman Weishaupt, il menader dil Teater giuven Grischun, ha annunziau a caschun dalla presentaziun dil program 2019 il vendergis vargau a Cuera da vuler concentrar sia purschida sin la sparta dils giuvenils. Per l’ina vegni il teater per affons gia curclaus dad autras instituziuns e per l’autra seigi la damonda buc avon maun. Weishaupt ei perschuadius da puder enfirmir la preschientscha dil Teater giuven ella scena e veta culturala grischuna, inaga entras la nova cunvegna da prestaziun cun il cantun Grischun che segirescha al teater per ils quater proxims onns contribuziuns annualas da 30 000 francs e davart dil marcau da Cuera 15 000 francs. Ed ulteriuramein cun igl engaschi parzial dad ina persuna responsabla per la preschientscha dil Teater giuven Grischun ellas medias socialas. Tuttina tonscha la contribuziun da basa da cantun e marcau da Cuera per bia buca per finanziar las occurrenzas planisadas e da curclar il preventiv da 247 000 francs definius per igl onn 2019. Il Teater giuven ei dependents dad ulteriuras donaziuns, denter auter da fundaziuns. Era per saver pagar las forzas arrivadas dalla scena da teater dil cantun Grischun promtas da s’engaschar per il Teater giuven. Annina Sedlacek ell’Engiadina Bassa e Marina Blumenthal en Surselva envidan ad in cuors dil giug da moviment duront las vacanzas da primavera a giuvenils a partir da 10 onns. Fiona Schmid ha gia entschiet cun ses giuvenils a Cuera cun las preparativas per tematisar Franz Wedekind e siu resvegl primavaun. Il medem vala per Barbara Schneider e sia lavur cun las giuvnas teatristas e giuvens teatrists a Glion. En omisdus loghens eis ei aunc pusseivel da siglir sil carr a giuvenils che resentan il giavisch da sepresentar sin tribuna. A Cuera ein las presentaziuns previdas ella Postremise ils 10/11/12 d’avrel ed el Cinema Sil Plaz a Glion vegn giugau teater dils giuvenils ils 4/5/6 d’avrel.

A Samedan maunca aunc 
in diember minimal

A Samedan ha Lorenzo Polin entschiet cun sia lavur da teater cun giuvenils. Il diember da tschun participonts tschentaus dil Teater giuven sco limita dad organisar il cuors ei denton aunc buca contonschius, aschia che la situaziun en l’Engiadin’Aulta ei momentan aunc incerta. Previda ei leu atgnamein ina collaboraziun cun il Hotel Waldhaus a Segl-Maria. La nova cunvegna da prestaziun ei colligiada cun entginas pretensiuns davart dil cantun. Per exempel da porscher silmeins duas presentaziuns en duas differentas regiuns dil cantun e davart dil marcau da Cura vegn la pretensiun per ina presentaziun ella capitala grischuna. Il marcau pretenda medemamein dil Teater giuven Grischun ina andanta indemnisaziun dils collaboraturs e Weishaupt ha explicau la voluntad dil Teater giuven dad ademplir quella pretensiun. La situaziun finanziala lubescha denton da schar ir en vigur ils contracts da lavur sulet sch’il cuors vegn la finfinala a strada. Cuort ha il menader dil Teater giuven aunc dau in’egliada anavos egl onn vargau cun la presentaziun da «Die vier letzten Dinge» a Cuera. Dus luvratoris da teater per affons a Glion, giugs auditivs, luvratoris per avanzai, visetas da teater cun giuvenils e la collaboraziun cun la scola claustrala da Mustér. Tut en tut ein 70 affons e giuvenils stai involvai en nov presentaziuns visitadas da 900 aspectaturas ed aspectaturs.