Tunnel per 
La Punt-Chamues-ch

Caos da traffic regia a La Punt-Chamues-ch. Almain cura che blers turists èn en la regiun. Per evitar las colonnas lungas e distgargiar la vischnanca dal traffic duessi dar in sviament. L’uffizi da construcziun bassa ha preschentà dacurt sia nova varianta – ina che custa 80 milliuns francs. 600 meters lung è il tunnel planisà che duess quasi ir sut il vitg en. El è l’element essenzial dal sviament planisà ed era la raschun principala per ils auts custs dad 80 milliuns francs. Pertge be il tunnel budgetescha l’uffizi da construcziun bassa cun 50 milliuns francs. Dasper è era planisà ina nova punt da 50 meters che maina sur l’En or. Cuntent ch’i dat moviment en chaussa sviament è il president da vischnanca Jakob Stieger. La suprastanza sustegnia il project cunquai ch’il sviament saja er impurtant per la vischnanca. Durant dis sco tranter Nadal e Bumaun, u durant la stagiun auta la stad, dettia quai bleras colonnas en il vitg, ed i dettia er accidents. La nova varianta ha dentant er insatge che na plascha betg uschè bain al president communal. La rundella che collia la vischnanca cun la via principala saja dal maun fallà. «Oriundamain eri gea planisà ch’i vegnia bajegià la rundella avant La Punt sch’ins vegn davent da l’Engiadin’Ota. Uss è ella dentant planisada da l’auter maun dal tunnel», sa disturba Stieger. «Uschia stuain nus tuts ir atras il sviament per ir a chasa u a la lavur cunquai che nus essan plitost s’orientads vers l’Engiadin’Ota.» Gia il 2015 aveva l’uffizi per construcziun bassa preschentà in’emprima versiun dal project dal sviament cun in tunnel. Quel aveva dentant la cumissiun federala per la protecziun da la natira e da la patria crititgà. Il chantun ha perquai ussa surlavurà il project. Il material or dal tunnel na vegn betg pli deponì al lieu e la rundella saja vegnida translocada da la vart dal sid dal vitg. Sche tut va tenor plan ed i na dat nagins recurs ils proxims 30 dis, lura quinta il chantun da pudair cumenzar cun la construcziun il 2020. El quinta cun in temp da fabricaziun da bundant otg onns.