Fiera da Nadal a Sedrun

(anr/sr) Il temps per s’entupar a caschun da fieras d’advent e da Nadal ei arrivaus ed ellas han liug en vitgs e marcaus. Sonda proxima dallas 14.00–20.00 envida l’Uniun da dunnas Tujetsch alla fiera da Nadal da Sursassiala a Sedrun ch’ha liug entuorn la halla polivalenta nova. Per buca concurrenzar ina l’autra e per saver garantir silmeins ina fiera da Nadal ella Sursassiala ein las uniuns da dunnas dalla Val Medel, dalla Val Tujetsch e Mustér secunvegnidas d’organisar la fiera alternond mintgamai en in auter liug. Igl onn vargau ha quella giu liug a Mustér ed uonn ein las dunnas tuatschinas vidlunder d’organisar. 32 exposituras ed expositurs pon ellas annunziar ed ei vegn a dar ina purschida varionta da marcadonts indigens, mo era dil Tessin. Ils visitaders san selegrar sin bialas decoraziuns, rauba d’artisanadi, products dils beins purils, specialitads dil Tessin e bia auter. Presents cun caussas zambergiadas ein la scoletta e scolaras e scolars dall’emprema e secunda sco era dalla tschunavla e sisavla classa da Sedrun. Als affons vegn purschiu la pusseivladad da zambergiar duront la fiera. Representantas e representants dalla Casa Soldanella a Rueras vegnan a porscher vin cauld e products ord lur producziun. «Las vuschs dil Rein» organiseschan ina fiera da plugls ed ina concurrenza cun premis. Ella Sala Cristala vegn purschiu in’ustria e silla plazza dat ei in brassamaruns, la pusseivladad da guder in bien raclette e bia auter.