Luzi Pfister ei niev president dil cussegl

(anr/hh) Il cussegl da vischnaunca da Breil ha approbau unanimamein il mardis sera ad Andiast il preventiv pigl onn 2019. Quei ha el fatg per mauns dalla radunonza communala dils 30 da november 2018. Il quen da gudogn e sperdita preveda entradas da 12,39 milliuns ed expensas dad 11,65 milliuns francs. Aschia duess resultar in gudogn da pressapauc 735 000 francs. La vischnaunca preveda da far investiziuns nettas da 3,3 milliuns francs. Medemamein per mauns dalla radunonza communala ha la legislativa approbau unanimamein il pei da taglia pigl onn vegnent. Quel munta a tschien pertschien dalla taglia cantunala. Il pei da taglia sin schischom resta sco entochen dacheu sin 1,7 permelli. Il cussegl da vischnaunca ha scaffiu ina nova plazza da lavur per la gruppa dil stradalesser. La fusiun dallas treis vischnauncas e la lavur supplementara vid las vias da meglieraziun han mussau ch’ei drova dapli persunal. Sco niev president dil cussegl da vischnaunca ei Luzi Pfister da Vuorz vegnius eligius. Vicepresidenta daventa Prisca Sgier da Danis e sco actuar 
ei il canzlist Curdin Cadonau vegnius reeligius.