Success cul cobolt da pan

DAD ANNATINA FILLI / ANR

Larissa Bott da Valchava imprenda il manster da pastiziera-conditra culla direcziun furnera. A chaschun da l’occurrenza «Conditoria» ha’la gnü success cun seis object da parada. Dürant l’exposiziun da mansters Fiutscher da l’eivna passada a Cuoira d’eiran expostas las ouvras dals giarsuns furners, pastiziers-conditers e confiseurs. Tanter quels eir l’object da parada da la giarsuna Larissa Bott da Valchava. Ella ha guadagnà in sia categoria la medaglia d’argient. La «Conditoria» es la concurrenza chantunala organisada da l’Uniun dals maisters pastiziers-conditers e confiseurs dal Grischun. Daspö ün pêr ons es l’exposiziun da la concurrenza integrada in l’exposiziun Fiutscher chi spordscha üna plattafuorma per tuot ils mansters chi’s po imprender i’l chantun Grischun.

Prescripziun dal plan 
d’instrucziun

Ingon ha gnü lö la concurrenza «Conditoria» per l’ottavla vouta e quai cun la partecipaziun da la giarsuna Larissa Bott. Ella frequainta il giarsunadi da pastiziera-conditra culla direcziun furnera a Ftan. Curdin Marugg, il mainagestiun da la Pastizaria Cantieni a Ftan, s’allegra dal success da sia giarsuna. «Ella es mia prüma giarsuna ed in seis seguond on da giarsunadi», manzuna’l. Tenor il plan d’instrucziun ston ils giarsuns dal seguond e terz on as partecipar a la concurrenza annuala da l’uniun chantunala. Il reglamaint prevezza duos categorias culs furners-pastiziers e’ls conditers-confiseurs. Ils furners-pastiziers han la lezcha da far ün oget cun pan, dimena cun pasta, farina ed aua. «In tuottas duos categorias nu’s das-cha tour a nüz mezs d’agüd sco colla o bastunins da lain o da metal», declera Marugg ün ulteriur punct dal reglamaint da la concurrenza. El es superbi da sia prüma giarsuna chi nun es be creativa, dimpersè eir interessada ed ingaschada per seis manster.

Lavurar fin cha tuot es fat

Bott es fascinada da sia professiun. Star sü a bunura bod nu tilla fa nüglia. «Eir sch’eu douvr il prüm üna mezz’ura fin ch’eu sun activa nun es quai ingün problem», disch la giuvna da la Val Müstair. Seis di da lavur cumainza intuorn las trais a bunura. La ledscha davart la protecziun da la giuventüna prevezza cha giuvenils suot l’età da 18 ons pon unicamaing üna not l’eivna cumanzar fingià a las duos a bunura. «Ils pastiziers nu tschüttan sün l’ura, els lavuran fin cur cha tuot la lavur es fatta», respuond’la a la dumonda cur cha seis di da lavur es a fin. Bott ha passantà si’infanzia a Valchava ingio ch’ella ha eir frequentà seis temp da scoula. «Eu nu savaiva uschè inandret che manster ch’eu laiva imprender.» Perquai ha’la dat ün sguard in differentas gestiuns fin ch’ella es rivada illa furnaria da Marugg a Ftan. «Eu sun gnüda retschavüda uschè cordialmaing, il team e’l manster m’han fascinà dal prüm di davent», s’algorda la giarsuna, «ed eu n’ha grond plaschair da lavurar culs differents materials e las diversas pastas.»

Investi diversas uras

Il tema da la «Conditoria» d’ingon d’eira il film. Per seis object da parada ha Bott tschernü la figüra principala dal film american «Trolls». Cun pan ha’la fuormà il cobolt e fat üna tuorta cun sü il purtret dal protagonist principal. «Nus vain stuvü far ün disegn dal purtret chi dess esser sülla tuorta. Lapro n’haja decorà il purtret cun fluors da prada, fattas da zücher.» Tuot quista lavur ha’la fat l’ultim mumaint. «Il prüm laiv’eu far ün oter motiv e quel nu m’es reuschi.» Per finir ha Bott lavurà mincha di dürant almain trais uras e dürant ün’eivna vi da si’ouvra. Cun seis cobolt ha’la pudü persvader a la giuria ed ha surgni la medaglia d’argient. «Da far da quistas figüras cun pan es fich difficil», declera Marugg. Sco ch’el disch nu’s saja mai co cha la pasta reagischa e co cha tuot guard’oura davo esser stat i’l fuorn. El svessa vaiva avant ons eir guadagnà la medaglia d’argient pro’ls giarsuns dal seguond on. L’idea dad esser preschaint culla concurrenza a l’exposiziun Fiutscher es, tenor el, fich salüdaivla. «Uschè survain eir nos manster daplü public e forsa cha l’ün o l’oter giuvenil as decida d’imprender furner, pastizier-conditer o confiseur.»