Cuira accepta «Eisball»

Uss èsi gartegià a la citad da Cuira da persvader ses burgais dad investir en la sanaziun dals indrizs da sport – il suveran ha decidì cun 81% in credit brut da 43,95 milliuns francs per il project «Eisball». El è seguì uschia a la proposta da la suprastanza e dal parlament da Cuira. Suenter che Cuira ha laschà ir da la glatscha giu il 2014 cun la «Gesak» in grond project da sanaziun e renovaziun po la citad uss prender en mira la realisaziun dal project redimensiunà «Eisball». Quel prevesa – per 43,95 milliuns francs e senza in auzament dal pe da taglia – il suandant: In bajetg da gardarobas cun tribunas e tetg – confurm a gieus da ballape da l’emprima liga ed American Football, ina plazza da ballape tar il bajetg da la tribuna, quatter plazzas da ballape – duas confurmas a gieus da ballape da la segunda liga e duas confurmas a gieus da la terza fin 5avla liga ed ina halla da glatsch per trenament – confurm a l’emprima liga da hockey sin glatsch. Il project «Eisball» aveva il sustegn da la pli gronda part da las autoritads politicas – numnadamain da la suprastanza e dal parlament da Cuira sco er tut las partidas cun excepziun da la pps. La pps n’ha uschia betg pudì persvader cun ses arguments. Ella è da l’avis che la citad stoppia spargnar per pudair realisar anc autras investiziuns en l’avegnir. Uschia per exempel la sanaziun da chasas da scola u dal bogn cuvert. En pli era la pps sa dustada cunter ina «tactica da salami» da la citad ch’haja lantschà avant «Eisball» gia tschintg projects da sport cun custs da sut trais milliuns ed uschia gest sut il cunfin per ina votaziun dal pievel ora e sper quel vi. Cun il GEA dals 25 da november pon las autoritads politicas da la citad serrar in chapitel da naufragis da projects da sanaziun a l’urna ed ir vid la sanaziun a l’ingronda. La citad da Cuira emprova numnadamain dapi il 2009 da far gust a la populaziun dad investir a l’ingronda en la sanaziun dals indrizs da sport.