Na al sutpassadi a Domat

(anr/hh) La situaziun dil traffic alla staziun dalla Viafier retica a Domat vegn buca migliurada – silmeins buca pil mument. Cun 1400 na encunter 976 gie han vischinas e vischins refusau la dumengia il credit pil sutpassadi niev Plazza Staziun–Via da Munt. La vischnaunca havess giu da surprender cuosts da biebein 4,3 milliuns francs. Dapi igl onn 1896 vegn il vitg da Domat spartius en duas parts entras il trassé dalla Viafier retica. Passadis directamein sur il binari e sutpassadis colligian las duas parts. Dapi biars onns cuntenta la situaziun denton buc, oravontut ord vesta da criteris da segirtad. Pliras emprovas da migliurar la situaziun han fatg naufragi.

Gronda investiziun

En cumbinaziun cun las investiziuns che la Viafier retica fa ella staziun fuss sepurschiu ina nova caschun da migliurar la situaziun cun ina via che meina sut il trassé ora. La via fuss vegnida concepida aschia ch’ella havess surviu ton per vehichels sco era per pedunzs e ciclists. Schegie ch’il project dalla staziun entras la Viafier retica ei in per sesez vesevan ton la viafier sco la vischnaunca la caschun unica da cumbinar quels dus projects. Ils interess eran vicendeivels. La planisaziun en detagl pil project dil sutpassadi fuss vegnida fatga ils proxims meins, la primavera havess la damonda da baghegiar saviu vegnir inoltrada. Ei era previu d’entscheiver cun las lavurs da construcziun igl atun 2019. Dils cuosts totals da 7,5 milliuns francs havess la confederaziun surpriu 440 000 francs el rom dil program d’aglomeraziun, il cantun 520 000 francs en favur dil traffic plaun sco era ina contribuziun da minimum miez milliun francs en favur dil traffic public. La Viafier retica fuss stada promta da sbursar persuenter 1,7 milliuns francs, aschia che la vischnaunca da Domat havess aunc giu da purtar 4,34 milliuns francs.

Contribuziun per la baselgia

La vischnaunca da Domat ha concediu in credit dad in milliun francs en favur dalla renovaziun dalla baselgia da s. Gion. La decisiun ei curdada cun 1829 gie encunter 502 na. La summa vegn sbursada en quater parts annualas a mintgamai in quart milliun francs naven digl onn vegnent. Ils cuosts totals per la renovaziun e sanaziun dil sanctuari ein calculai cun tschun milliuns francs. Igl edifeci sacral ha in basegns da sanaziun ton egl intern sco ordadora. La davosa renovaziun externa ei succedida avon rodund 60 onns, la davosa egl intern avon 70 onns. Pliras lavurs externas han stuiu vegnir fatgas per impedir che material crodi e pericliteschi glieud. La sanaziun e restauraziun duei succeder ils proxims quater entochen tschun onns. Per saver finanziar quei project ei la pleiv dependenta d’agid finanzial d’ordeifer. Claramein gie ha il suveran da Domat detg al preventiv 2019 ed al pei da taglia.