Chattà schacal mellen

A Clugin en la vischnanca Andeer ha ina dunna chattà il venderdi suentermezdi in schacal mellen crappà. Sco che Hannes Jenni da l’Uffizi da chatscha e pestga dal Grischun ha ditg envers RTR sa tracti d’in mastgel. La vegliadetgna na saja anc betg clera. L’animal saja vegnì mazzà entras ina morsa en la tatona, probablamain d’in luf u d’in chaun ferm. Cura che l’animal saja mort na saja anc betg enconuschent. Ma probablamain na sa tracti anc betg d’in lung temp. Il schacal mellen ch’è vegnì mazzà il 2015 per sbagl d’in chatschader è exponì en il Museum da la natira a Cuira. Observaziuns da schacals mellens piglia l’Uffizi da chatscha e pestga gugent encunter.

Il president communal da Furna e deputà dal cussegl grond Simon Erhard è sa disgrazià tar in accident da lavur.

Il president communal da Furna e deputà burgais-democrat en il cussegl grond, Simon Erhard, è mort. Quai ha confermà il manader dal secretariat dal cussegl grond, Domenic Gross, sin dumonda da RadioTelevisiun Svizra Rumantscha.

La sonda era Simon Erhard vi da lavurar sin in tetg d’ina stalla ad Aschera-Pusserein cura ch’el è crudà radund quatter meters en la profunditad sin ina platta da betun e mort anc en il lieu.

La polizia chantunala e la Procura publica investigheschan en chaussa.