Alla sera, al stgir, al misterius

(anr/abc) Igl ei buc igl emprem concert da quei chor. El ei il «schumellin» dil Chor d’affons Sumvitg. Il Chor d’affons Surselva cun ses varga 60 affons ei sepresentaus la fin d’jamna a Vella ed a Laax. Cun lur esser, cunzun tras il cant, san affons scatschar patratgs e panzieris che mudregian. En quei senn han ils dus concerts adempliu lur scop, ton ei segir. Malgrad ina tematica «stgira» ha franc negin giu tema da visitar l’occurrenza. Il placat ed il fegl sgulont han fatg gust. Ins ha viu in uaul, illuminaus dalla glina, enamiez denter las plontas in cavriel tut persuls. La dirigenta Rilana Cadruvi haveva exercitau cun varga 60 affons da sis tochen 15 onns in program cul tema «stgiradetgna». Buc ina sempla tematica, il november ch’ei vegn pli e pli stgir. Massa interessai han dau suatientscha agl invit dil chor. La sonda a Vella e la dumengia a Laax ein las baselgias stadas stignadas pleinas. 17 canzuns han ins astgau guder, tuttas cantadas ordadora. Ils affons ein sepresentai en gruppas e sco chor grond. Ins sa s’imaginar che la dirigenta ha buca mo saviu smaccar sil nuv e tut ei iu da sesez. Tuts han buca saviu cantar immediat text e melodias. Exercitar 17 canzuns en differents lungatgs e stils ei pretensius, era per affons. Ei po esser che cantaduras e cantadurs pigns, mesauns e gronds san memorisar pli tgunsch. Peringada eis ei stau in’ura magica ellas baselgias da Vella e da Laax.

L’entira magia han Rees Coray cun siu contrabass e la pianista Johanna Scherer susteniu. Ils instrumentalists han fatg effect, gest tuttina sco l’illuminaziun speciala che Gieri Spescha ha inscenau. Dall’emprema tochen tier la davosa canzun ha il chor saviu divertir, animar e scatschar panzieris. Nuot ha pudiu interrumper e disturbar l’atmosfera. Gnanc ils spérts e las strias ellas canzuns. Tgei vul in chor contonscher dapli? Ins ha gudiu canzuns finas e commuentontas, tocs plein slontsch cun moviments, tut cantau clar, uliv e bein intonau. La renomada canzun «Nacht wird’s wärde» da Linard Bardill e «Quaida not» da Peter Appenzeller ein duas melodias ch’ins savess tedlar e tedlar. La gruppa dallas cantaduras grondas ha delectau cun pliras balladas, denter quellas la norvegesa da durmentar «Sove, dromme i den dos» ed il renomau himni franzos «O nuit» da Rameau.

«Vuschs admirablas» han ins udiu a scutinar els bauns. Il concert ei ius a fin culla canzun da Thomas Cathomen «Stgiradetgna». Ch’ils affons contan bugen quella han ins s’encurschiu, ei savess daventar ina canzun romontscha ch’auters chors d’affons en Svizra vegnan a scuvierer. Igl auditori ha engraziau al chor cun ferm applaus. Suenter in supplement han ins s’encurschiu ch’ils pigns fuvan staunchels, aschia ch’igl auditori ha stuiu schar ir il chor. Malgrad ch’ins havess aunc tedlau gitg.