La discussiun agrara cuntinuescha

Dad Andreas Cadonau / ANR

Cun la consultaziun ha igl Uffeci federal d’agricultura lantschau la discussiun per il svilup futur dalla politica agrara. Sefatschentar da rudien cun las propostas e cun igl effect sin l’agricultura grischuna vul l’Uniun purila grischuna. Dacuort ei la suprastonza sescuntrada cun il vicedirectur digl Uffeci federal d’agricultura Bernhard Belk a Mustér. Per fundamentalas valetescha il president dall’Uniun purila grischuna, Thomas Roffler, buca las propostas ch’han dacuort bandunau igl Uffeci federal d’agricultura per sviluppar la proxima fasa dalla politica agrara svizra a partir digl onn 2022. Tuttina ha Roffler annunziau da vuler examinar da rudien igl effect dallas propostas sin l’agricultura grischuna. Per puder prender posiziun entochen la fin mars 2019 enaquella che la fasa da consultaziun ei terminada. Il president dall’uniun purila ha fatg attent alla scuntrada dalla suprastonza cun il vicedirectur digl Uffeci federal d’agricultura Bernhard Belk l’entschatta november a Mustér. Per retscheiver las informaziuns necessarias davart dalla persuna cumpetenta en caussa. Belk ei numnadamein responsabels enteifer igl Uffeci federal d’agricultura per ils pagaments directs ed il svilup campester. Buc acceptabel fuss per il president dall’Uniun purila grischuna da sviar pagaments dad ina zona enteifer il cataster da muntogna en tschella ni schizun ella Bassa. Roffler ha fatg attent agl argumentari che plaidi encunter in tal scenari, numnadamein il fatg che l’agricultura da muntogna genereschi las pli paucas entradas viers ils menaschis situai ella Bassa. Sco quei che Benk ei s’exprimius a Mustér ein talas sviadas era buca previdas. En ina intervesta cun l’ediziun dall’Uniun purila grischuna ha el denter auter regurdau a diversas pretensiuns davart dalla societad svizra viers l’agricultura che semuossien en pliras iniziativas agraras sin rucca. Plinavon ha el tschintschau dad ina cuntinuada evaluaziun e dad impunder ils daners leu nua ch’els procurien per igl effect giavischau.

Spetgar sin indicaziuns 
pli detagliadas

Las explicaziuns si da Berna ha il president dall’Uniun purila grischuna bein udiu. Roffler spetga denton aunc indicaziuns pli concretas pertuccont adattaziuns dils pagaments directs per puder prender posiziun en caussa. Aspects positivs vesa Roffler tuttavia ella nova da desister viers midadas enteifer il sustegn dall’alpegiaziun. Roffler ha accentuau la coordinaziun dallas posiziuns davart dallas uniuns purilas e dils cantuns da muntogna. Gest per quei motiv tematiseschien ils representants purils dils cantuns da muntongna las novas propostas dalla confederaziun en ina proxima sesida a Berna. Politicamein pli impurtont seigien denton las conclusiuns ch’igl Uffeci federal d’agricultura traigi ord las diversas reacziuns enteifer la fasa da consultaziun. E tgei ch’il cussegl federal propona la finfinala en sia missiva al parlament. Roffler ei cunscients che buca sulet ils representants dall’agricultura svizra vegnien a formular lur pretensiuns e propostas puncto agricultura viers igl Uffeci federal d’agricultura. Ton pli impurtonta ei tenor il president dall’Uniun purila grischuna la solidaritad enteifer l’agricultura. «Sche quella ei buca dada havein nus in grev stan ellas proximas lutgas politicas.»

Buc exnum las medemas visiuns

Che las visiuns pertuccont il svilup dalla politica agrara svieschan magari enteifer l’agricultura sezza selai veser denter la posiziun dall’Uniun purila dil cantun Berna e las pretensiuns davart dalla SAB, la Gruppa svizra per las regiuns da muntogna. En ina posiziun strategica fa la SAB attent alla muntada dils menaschis agricols cun gudogn auxiliar. Varga 50 pertschien dils menaschis purils el cantun Valleis ein menaschis nua che passa la mesadad dil temps da lavur ei impundida ordvart igl agen menaschi, en Svizra strusch ina tiarza. La SAB pretenda dapli risguard viers quels menaschis cun gudogn auxiliar. Per exempel ina contribuziun fundamentala e meglier access a credits d’investiziun. L’Uniun purila bernesa ha stipulau visiuns gest a disfavur dils menaschis cun gudogn auxiliar. Roffler ei cunscients che la politica agrara 2022+ pretenda aunc dabia engaschi e lavur e provochescha intensiva discussiun.