Sentupada el museum da skis a Flem

(gg) Il referat da Beat Livers en siu museum da skis a Flem Vitg ed il referat dil guid da muntogna Paul Degonda el medem liug ein semussai mesjamna vargada sco buna cumbinaziun. Il president Hanspeter Meiler e la coordinatura dalla sera Renata Jäger han beneventau ils numerus presents ed introduciu el program. Lu ha Beat Livers surpriu la bitgetta ed orientau sur dalla historia da siu museum e da certs skis ch’el ha rimnau el decuors da sias activitads.

Museum da skis

Tenor Livers ha el mess all’entschatta da sia collecziun tut ils skis vegls ch’ein setschentai tier el dalla vart. Cul temps ha quei dau mantuns tut tschufs ch’han clamau da far uorden. Uss dispona siu museum da rodund 1400 pèra skis dils onns 1850 tochen oz. Negin ski vegn avon duas gadas. Tut ils skis ein ordinai tenor in clar sistem. Ils emprems skis seigien vegni construi ord lenn. Quels seigien mai stai sin pista e vegnevien duvrai per exempel da purs per ir tras la neiv a luvrar. Las ligiadiras erien all’entschatta fetg semplas e devien quasi negina segirtad. Era ils emprems skis per affons hagien buca giu ligiadiras che devien segirtad. Cul temps seigien ellas sesviluppadas alla qualitad dad oz. Tgi ch’hagi propi inventau ils skis seigi buca segir. Ei emporti era buca bia schebein quei seigi stau ils Engles ni ils Austriacs. Duront las explicaziuns da Livers sur da differentas marcas da skis, dallas aissas da skis e dils auters exponats han ils presents saviu seregurdar cun plascher cun tgei marcas ch’els seigien stai confruntai dad ir cun skis el temps vargau.

Guid da muntogna

Paul Degonda ha orientau il publicum cun raquens, fotografias e films sur da sia lavur, sias experientschas ed aventuras sco guid da muntogna. Gia da giuven seigi el staus fascinaus dalla natira, ius bia cun skis, hagi fatg turas ed hagi era vuliu ir a reiver. Quei hobi ei lu daventaus siu mistregn. Cun 20 onns ha el entschiet sia lavur sin quei camp. Oz meina el ina fatschenta che porscha ina lada paletta da disciplinas dad ir cun skis ni da reiver, e quei en Svizra sco era egl exteriur. Cun sia fatschenta porscha el turas, scolaziun ed instrucziun cun examens e cuors da lavinas. Ord ils raquens e films sur da sia lavur da stad e d’unviern semuossa la fascinaziun da Degonda tier tut las activitads. Quella vegn suttastrihada da bellezia fotografias davart ils differents sports en grondiusas cuntradas. Il reiver sin preits da glatsch, las turas aultas, il reiver alpin tochen sils spitgs dalla pezza, magari cumbinai cun trecking, quei tut porta tenor Degonda bials muments, denton mintgaton era spitachels. Il reiver seigi in sport che drovi cundiziun, forza, curascha ed ina buna cumbinaziun dils moviments. Fascinaus semuossa Degonda da sias turas ed expediziuns en tiaras jastras sco per exempel: Stadis Uni, America dil sid, Canada, Alasca, Africa, Georgia, Tibet e Nepal. Speciala ed attractiva seigi era la Norvegia cun sias glischs polaras. Leu fascineschi la cumbinaziun da far turas els cuolms ed ir cun barca sin la mar e tras fiords. Denton seigi sia clamada era en Svizra captivonta. Leu carmalien numerusas turas pli cuortas ed era pli liungas cun star sur notg en camonas. Il Bernina ed igl Eiger porschien medemamein experientschas fascinontas e pretendien en tuts graus bunas habilitads davart atletica e reiver.

Aperitiv

Ils dus referents han mintgamai raccoltau grond applaus. Tier igl aperitiv che la Cuminonza Romontscha Flem ha purschiu han ils commembers ed ils hosps giu caschun da discuorer culs referents. La sera ei ida a fin cun interessants contacts persunals ed en buna cumpignia.