Premi per l’ingaschamaint da Kurt Baumgartner

Da Flurin Andry / ANR

Per la quarta vouta es gnü surdat il premi «Hotelier da l’on» in Svizra. Kurt Baumgartner chi posseda e maina a Scuol trais hotels ha persvas a la giuria cun sia prontezza d’investir in progets innovativs. Il magazin specialisà «htr hotel revue» onurescha daspö l’on 2015 minch’on il «hotelier svizzer da l’on». Las organisaziuns portadras sun l’uniun Hotelleriesuisse, la scoula d’hotellaria Lausanne EHL e la VHD (Vereinigung dimplomierter Hoteliers). Cun quist «award» dessan gnir premiadas persunalitats chi s’han profiladas illa branscha grazcha a success ed innovaziun. Ellas sun uschea dad interess particular pell’hotellaria naziunala. In mardi saira ha gnü lö a Turich i’l Bernhard Theater la «Award-Gala». Il premi, ün video prodüt dal partenari Globe TV dals hotels dals trais nominats Kurt Baumgartner da Scuol cun sia gruppa d’hotels Belvedere, Belvair e Guardaval, Reto Invernizzi cun l’Hotel Kemmeriboden-Bad a Schangnau e Nathalie Seiler-Hayez cul Beau-Rivage Palace a Lausanne, vain muossà i’l prossem temp in tuot la Svizra. Il titel «hotelier da l’on» però ha survgni be ün, nempe Kurt Baumgartner.

«Success adonta da las cundiziuns 
na favuraivlas»

La giuria chi vaiva nominà la candidata e’ls candidats pel titel «hotelier da l’on» e tschernü il victur es gnüda presidiada dad André Witschi, il president dal cussagl da fundaziun da la Scoula d’hotellaria Lausanne e president da la Scoula svizra per turissem Passugg. Las ulteriuras 11 commembras e commembers da la giuria d’eiran tuot persunas chi han da chefar cun turissem, hotellaria ed economia da manaschis. Ün da quels es p. ex. Christian Lässer, professer per turissem e management da servezzans a l’Università da San Galla. La giuria ha tschernü pel premi a l’hotelier oriund da Kriens Kurt Baumgartner «per sia prontezza da ris-char e d’investir permanentamaing e cun success in progets innovativs». Cha Baumgartner saja sgüra ün dals hoteliers chi s’hajan profilats il plü ferm i’ls ultims ons in Svizra, ha ella motivà sia decisiun, «güsta ill’hotellaria in regiuns muntagnardas chi nun ha actualmaing uschè simpel til grataja d’avair success grazcha a progets innovativs».

Daspö l’avertüra dal tunnel 
dal Veraina

Baumgarnter es activ a Scuol daspö l’on 1999. Quel on d’eira gnü drivi il Bogn Engiadina Scuol e plü tard il tunnel dal Veraina. Quai til ha dat, sco ch’el disch, l’impuls da cumprar quel on l’Hotel Belvedere immez Scuol. Daspö quella jada ha’l investi in quist hotel ed eir in nouvs progets divers milliuns francs. Uossa, davo s-chars duos decennis, posseda Baumgartner a Scuol eir amo ils hotels Belvair e Guardaval. Implü ha’l eir fabrichà in cumün plüssas chasas. El dà lavur a var 165 persunas chi abitan dürant tuot l’on illa regiun. Martina Stadler, la directura dal Turissem Engiadina Scuol Samignun Val Müstair SA, s’allegra da quist titel per l’hotelier a Scuol: «Quai cumprouva ch’ün hotelier po avair cun curaschi e spiert innovativ success in quista branscha cun gronda concurrenza», disch ella, «il premi nu rinforza be l’image da seis trais hotels a Scuol, el es eir üna recloma excellenta per tuot la regiun.» Cha l’onurà viva quist spiert d’hotelier, accentuescha la turisticra, «cun sias investiziuns procura’l cha seis hotels spordschan adüna buna qualità.» Stadler agiundscha cha l’hotelier Baumgartner saja ün bun exaimpel pels collegas in muntogna ed eir illas otras regiuns in Svizra.