El «bastiment» eis ei aunc freid

(anr/abc) Ier ei il Center Stenna a Flem s’aviarts. Silmeins la stizun Coop, ina dallas fittadras principalas, ha envidau ils consuments da vegnir igl emprem gi a fuffergnar e cumprar. Ier endamaun allas 08.00 ei la stizun «gronda» s’aviarta. La glieud ei buca stada colonna avon l’entrada dil Center Stenna. Igl ei aunc memia ruasseivel a Flem. La stizun veglia dil Coop alla Via Nova ei serrada, aschia ch’ils indigens da Flem han giu dad ir l’emprema gada silla Punt Gronda per far cumissiuns. L’emprema impressiun ei stada ch’igl ei gnanc aschi grond sco spitgau. Igl ei ina stizun surveseivla, cun dapli plaz, ell’ei denton buc aschi gronda sco il Center Grüneck a Glion. Aunc uss eis ei dètg ruasseivel el cumplex dil Stenna, il «bastiment» spetga aunc sils passagiers. Tiels consuments han ins s’encurschiu ier endamaun nuot da hectica e truscha. Auter tiels mistergners. Els lavuran cun squetsch enorm, dapertut ein electricists e montaders fetg fatschentai da trer lingias ed endrizzar. En in’jamna ha igl investur Iso Senn l’avertura ufficiala cun autoritads e prominenza. Denter auter vegn era cusseglier naziunal Martin Candinas ad esser presents. Ier han ins entupau el Center Stenna glieud ch’ei vidlunder da s’orientar ed encurir. Per exempel nua che l’apoteca da Flem ei. Quella ei ussa directamein sut la Punt Gronda, sil medem plaun cul Coop. Suenter la bardigliada dils davos gis havevan l’apotecra Jolanda Erb e sias assistentas da farmazia in sulet problem: ei seigi freid, dapertut tili ed ellas sentien l’aria currenta. Remiedis encunter tut ils malessers, struha e cunauras han ellas detgavunda. Buca da far curvien ch’ei tila dapertut, pertgei la halla gigantica cullas scalas rullontas ei aviarta, portas sesarvan e sesiaran ad incuntin. En egl dat ei che las preits e plantschius da colur antrazit rendan igl entir cumplex pulit stgirs. Era l’Arena Alva ei fetg presenta el Center Stenna. L’interpresa turistica ha access direct sin treis alzadas. Igl access al territori da skis ei concepius semegliont sco a Laax Murschetg. Ei ha massa survetschs, biro d’informaziun, in grond café e stizuns. Era il hotel «The Hide» sco era las ustrias «The Hide Deli» e «The Hide Dining» ein aunc buc aviartas. La stagiun ha aunc buc entschiet. La truscha e la hectica el Center Stenna vegnan a s’augmentar considerablamein las proximas jamnas. Autruisa fuss zatgei buc en uorden ed igl investur stuess far quitaus.