Gronda delegaziun rumantscha 
tar il biatlon

(rtr) Gist sis biatletas e biatlets rumantschs sa legran sin la nova stagiun da biatlon cun il punct culminant, ils campiunadis mundials l’entschatta mars ad Östersund en Svezia. Ils Rumantschs lantschan dentant la nova stagiun cun differentas finamiras. Betg tuts pon adina ir a la partenza da la Cuppa mundiala, per intgins è la tribuna la cuppa IBU, la segunda classa da cursas internaziunalas da biatlon.

Eligius Tambornino va cun nova motivaziun en la nova stagiun

Uschè ditg ch’el haja plaschair vi dal biatlon e saja motivà stettia el fidaivel al sport da professiun, malgrà ch’i na saja betg i sco giavischà ils davos onns. En il biatlon stoppian omaduas parts funcziunar per avair success, sajettar bain e currer spert. Quai di Eligius Tambornino ch’ha midà avant quatter onns dal passlung tar il biatlon. L’anteriur spezialist da sprint ha pudì trenar bain la stad. Nova motivaziun dat er sia famiglia. Tambornino da Trun è daventà l’entschatta da l’onn bab d’ina Xenia e la stad ha el maridà.

Irene Cadurisch dovra pazienza suenter l’operaziun

La biatleta da Malögia è sfurzada da persequitar las emprimas cursas da biatlon be a l’ur da la loipa u a la televisiun. Suenter sia operaziun vid omadus pes dovria ella anc temp per puspè esser là nua ch’ella eria avant questa blessura. Cadurisch ch’ha gudagnà als davos Gieus olimpics a Pyeongchang en la Corea dal sid gist dus diploms olimpics (8. sprint e 6. staffetta) quinta dad esser enavos la fin schaner.

In dals puncts culminants per la Bregagliotta èn ils Campiunadis d’Europa en la Bielorussia. Sch’i tanscha anc da pudair parter en la Cuppa mundiala 
en questa stagiun stat anc scrit en las stailas.