Radunanza da preventiv

(anr/bcs) Il suveran dal cumün da Val Müstair ha approvà il preventiv cumünal e fixà il pè d’impostas sün 120 pertschient. Eir ils preventivs dal center da sandà, dal PEM e dal Parc da natüra Biosfera Val Müstair han chattà l’acconsentimaint da la radunanza. Il preventiv dal quint da success muossa pro entradas da 13 408 900 francs e sortidas da 13 553 200 francs ün s-chavd da 144 300 francs.

Las 45 votantas e votants han deliberà il credit cun gronda pluralità. Eir ils preventivs sun gnüts approvats. Il pè d’impostas es gnü fixà sco fin qua sün 120 pertschient. La revisiun parziala da la planisaziun cumünala pel deposit da material Domuglins illa fracziun da Müstair e la ledscha da fabrica reguard plazzas da parcar sun eir gnüts approvats. In seis preambel ha manzunà il president cumünal Rico Lamprecht la situaziun finanziala dal cumün da Val Müstair. La suprastanza cumünala s’es consciainta cha la situaziun finanziala es plütost flaivla.

Masüras da spargn saran per l’avegnir indispensablas. Pro’l persunal daja prosmamaing divers chi van in pensiun e la dumonda centrala sarà scha quellas plazzas vegnan rimplazzadas o schi’s tira a nüz sinergias internas.

Ils cuosts dals secturs sandà e social e las associaziuns cun instituziuns regiunalas chaschunan adüna daplü cuosts, sainza cha’l cumün pudess tour influenza. Las entradas e sortidas dal cumün da Val Müstair nu sun equilibradas, uschè chi’s sto preverer d’augmentar il chapital ester. Impustüt las entradas e sortidas dal resort La Sassa varan üna grond’influenza sül resultat dal preventiv.