Avant 100 onns è mort William Wolfensberger

(cp) William Wolfensberger era vegnì il 1914 sco giuven reverenda en la Val Müstair. Pervia da l’Emprima Guerra mundiala ha el stuì surpigliar en pli il presidi communal e manar la scola dad otg classas da Fuldera per remplazzar ils umens absents en il servetsch activ. Da Nadal dal 1914 al ha la vischnanca engraziaivla attribuì il dretg da vischin d’onur. William Wolfensberger ha er stuì gidar a finanziar diversas acziuns sco furnir il proviant per la vischnanca ed indrizs d’infrastructura sco la sanaziun dal santeri. Per quest scopo ha el referì giu la Bassa ed ha publitgà en gasettas e cudeschs istorgias e poesias da la Val Müstair.

William Wolfensberger spetgava dals pli bainstants da la vischnanca ch’els sa participeschian er sezs cun imports pli gronds vi da las chargias finanzialas. Cun quai è el sa fatg «persona non grata» ed ha suenter dus onns e mez puspè stuì bandunar la Val.

Ils 6 da december 1918 è William Wolfensberger mort cun 29 onns a Rheineck SG da la gronda grippa spagnola. La pli gronda part da si’ovra litterara è vegnida publitgada pir suenter sia mort en divers cudeschs. Durant ils onns 1920/1930 han quels gì in grond success ed èn adina puspè vegnids restampads. Adina puspè han ins dentant er translatà e publitgà diversas da sias 
ovras en rumantsch cun il sentiment 
che quellas istorgias sajan vairamain «nossas».

Suenter che William Wolfensberger fiss prest cumplettamain vegnì emblidà han ins piglià l’occasiun da ses 100avel anniversari 1989 e da ses 100avel onn da mort per refar ses relasch litterar e mantegnair sias ovras social-criticas ed a medem temp er pastoralas per l’avegnir.