Dumengia da praulas

(anr/abc) Nadal s’avischina, il temps da spetga, igl advent, gaudan oravontut famiglias cun affons pigns e da scola. Ei vegn fatg biscuits, ins decorescha la casa ni la habitaziun, ora ellas vias glischan cazzolas. Duront quei temps ei l’atmosfera semplamein autra, pli festiva. A quei dat la gruppa dil comite «Ilanzer Märchenstadt» peisa. A Glion dat ei dumengia proxima puspei massa pusseivladads pils pigns. La «Dumengia da praulas» che la gruppa organisescha dapi onns mintgamai la secunda dumengia d’advent ei s’avanzada ad in’attracziun surregiunala. Tedlar praulas e historias en quella e tschella casa ei l’attracziun principala. Igl ei in suentermiezgi ch’ins vesa a Glion massa famiglias. Geniturs san ir cun lur pigns ellas casas ch’ins viseta schiglioc buc. Per exempel en Casa Cumin. La sala da cumin ei la «basa», leu s’entaup’ins e resta in tec a cauld cun petta e caffè ni ina suppa che scaulda. En differentas autras casas san ils affons tedlar praulas e historias. Uonn raquenta Anna Cathomas en Casa Gronda «praulas da taunas e lur habitonts». Ella Casa Pfister tier la Lia Rumantscha presentan ins il niev cudisch dalla famiglia Babulin e la casa-pervenda reformada ei la casa dil Casparet. Era la casa da Diu, la baselgia, ei integrada el program dil suentermiezgi. Il chor d’affons Cantalino concertescha allas 17.30 ella baselgia catolica. Il «Marcauet da praulas» respectiv la «Dumengia da praulas» a Glion ei pusseivels mintg’onn grazia ad ina roscha sponsurs e gidonters che sustegnan l’occurrenza da famiglia.

Il «Marcauet da praulas» ei dumengia suentermiezgi, ils 9-12 dallas 13.00 tochen allas 18.00. Il comite d’organisaziun envida affons e famiglias da vegnir a Glion e guder quei suentermiezgi.