Shaolin a Tschlin

(rtr) Radiotelevisiun Svizra Rumantscha (RTR) envida a la premiera dal film da Susanna Fanzun. Il film «Shaolin a Tschlin – Corsin Biert e l’art da cumbatter» è l’istorgia d’in um che sa bain ch’i vala la paina da cumbatter per ses siemis e da vesair crisas sco schanzas per insatge nov. La premiera ha lieu mardi, ils 11 da december 2018 a las 20.00 en il Center da Bainesser a Tschlin. La crisa è vegnida andetgamain. Corsin Biert da Scuol lavurava en l’hotellaria cura ch’el è crudà en ina fora. El è ì en China per daventar saun e per chattar puspè ses equiliber. Dus maisters da Shaolin chinais han trenà e scolà Biert ed al han gidà or da sia crisa. El è turnà saun e frestg en l’Engiadina. Prendì cun sai ha el l’idea da crear en sia patria in center da bainesser.

Oz instrueschan a Tschlin dus maisters chinais qigong, tai chi e kung fu. La chasa da scola veglia e la sala polivalenta èn il «Center da Bainesser». Quai ha er purtà tensiuns en il vitg quiet. 
Societads e persunas privatas na pudevan pli disponer libramain da la sala 
polivalenta. Dentant è la situaziun sa calmada.

Ma Biert è confruntà cun ina nova difficultad: Survegnan ils dus maisters danovamain la permissiun d’entrar en Svizra? L’istorgia da Biert mussa ch’i vala la paina da cumbatter per ses siemis 
e da vesair crisas sco schanzas per insatge nov.

Cuntrasts: «Shaolin a Tschlin – Corsin Biert e l’art da cumbatter»

dumengia, ils 16-12-2018, 17.25 sin SRF 1 (cun suttitels tudestgs) ubain sin rtr.ch/play.

Repetiziuns:

mesemna, ils 19-12-2018, 08.30, 09.30, 12.50 sin SRF info

gievgia, ils 20-12-2018, 11.00 sin SRF info

sonda, ils 22-12-2018, 17.15 sin SRF 1