Dau dapli valeta al Lag Grond e siu contuorn

Da Hans Huonder / anr

El decuors dils davos dus onns ha la vischnaunca da Laax projectau e realisau entuorn il Lag Grond nova infrastructura. En special setracta ei dalla casa da cultura «Cularta – atelier e gallaria», l’ustria Lags e la casa da parcar. La sonda suentermiezdi ei quell’infrastructura nova e plascheivla vegnida inaugurada. Il Lag Grond a Laax attira bia glieud. Situaus praticamein amiez il vitg eis el tschercaus per spassegiadas, mo era per far bogn ni semplamein sedivertir. Uss ei il liug per entginas attracziuns pli rehs. Avon in onn han vischinas e vischins da Laax decidiu d’ereger leu nova insfrastructura, investar el contuorn ed aschia da far il liug aunc pli attractivs. Persuenter ha la vischnaunca sbursau en tut 8,9 milliuns francs. El rom d’ina fiasta d’inauguraziun ein la casa da cultura Cularta, l’ustria Lags e la nova casa da parcar vegnidas surdadas ufficialmein la sonda vargada a lur intent.

Esser attractivs

La finamira dall’investiziun ei clara: Cun quell’infrastructura nova vegn il vitg revaletaus sco liug d’habitar e da vacanzas. Da quellas investiziuns duein ils indigens e hosps profitar en lur temps liber. Mo buca mo quei: Parallelmein genereschan ellas era entradas al commerci e la finfinala alla vischnaunca sezza. Punct da partenza pil concept realisau ei stau il giavisch d’in’ustria spel lag sigl areal dils implonts da sport e temps liber cun la finamira da procurar ch’il Lag Grond mantegni siu caracter natiral. Il concept pil contuorn dil lag secumpona denter auter da duas zonas d’activitad, mo lu era ina zona da sentupada sco liug da colligiaziun dil lag cun il center dil vitg. Bauns e pumera carmalan da far in paus. In element niev agl ur dil lag ei l’ustria. Il provisori existent cuntentava buca pli. Il baghetg niev ei concepius e realisaus cun risguard dil maletg dil contuorn. El lubescha ton in menaschi da stad sco d’unviern. La stad ei il baghetg il punct central pils sports dall’aua, igl unviern survescha el sco refugi per spassegiaders, patinaders sco era per pintgas skiunzas e pigns skiunzs.

Per art e cultura

Il ulteriur element el rom da quei project tegn quen dils interess digl art e dalla cultura da Laax: La casa da cultura ed art Cularta. La casa duei esser in liug da sentupada e lavur per artistas, artists ed amaturs digl art. El center duei igl art visual star. Grazia a sia multifuncziunalitad porscha igl edifeci spazi per projects da scola, jamnas da cuors, occurrenzas sco referats, seminaris, teater, sault, film, litteratura e musica. Cheu duei era vegnir organisau activitads. Per l’avertura dalla casa ei vegniu purschiu in’exposiziun cun lavurs d’Annatina Dermont, Linard Nicolay e Luis Coray sco era da Flurina Manetsch, Michel Pfister, Remo Arpagaus, Theres Jörger ed Yvonne Gienal, la responsabla per la casa. Buca d’emblidar la nova casa da parcar. Grazia a quella sa Laax porscher futuramein ulteriurs parcadis als visitaders dil vitg e dil lag.

Il lag – il cural da Laax

Cun occasiun dalla fiasta d’inauguraziun dils stabiliments novs la sonda suentermiezdi ha il president communal Franz Gschwend plidau d’in impurtont di per Laax: «Il Lag Grond ei il cural da Laax. A quei cural havein nus dau nova tempra, aschia che sia tarlischur ei uss aunc pli biala en quei contuorn attractiv. Propi veseivels con bials ch’el seigi vegni il contuorn denton a semussar pér en in miez onn cu la natira seigi en cumplein svilup.» Primavera vegnan las vias sanadas e las punts el contuorn dil lag aunc montadas e silsuenter tut verdinau. Gschwend plaida d’in onn 2018 cun bia lavur: «Dapi Pastgas ein sulettamein otg meins vargai. En quei interval da temps ha la vischnaunca investau 8,9 milliuns francs ell’infrastructura entuorn il lag. Sco ins sa seperschuader ei l’investiziun buna – igl emprem impurtont pass en direcziun d’ina destinaziun digl entir onn ei fatgs.»

Architectura adattada al contuorn

En connex cun siu engraziament allas interpresas participadas numna el quater persunas. Daniel Wegmüller dil biro da planisaziun Wegmüller da Claustra ch’ei staus responsabels per la formaziun entuorn il lag, ils architects Conrad Pally e Patrick Rothmund da Pally e Partenari da Laax/Trun ch’han planisau la casa da cultura Cularta e l’ustria Lags sco era Clemens Arpagaus dil biro d’inschignier Clarplan da Vella/Laax ch’ha planisau la casa da parcar Grava sco era fatg las lavurs d’inschignier pils treis baghetgs novs. «Cun la nova infrastructura spel lag revaletein nus la purschida dil contuorn. La formaziun nova dat alla bellezia dil lag ina nova dimensiun, surtut era perquei ch’ils baghetgs novs van bein a prau cul contuorn», di Gschwend. La fiasta d’inauguraziun ei vegnida enramada da producziuns dil Chor viril Laax sut la direcziun da Remo Arpagaus. Il scolast da musica Hanspeter Bircher e la scolara da Laax Annina Wolf han purschiu in concert cun trumbetta el liber. El rom digl act festiv d’inauguraziun ein ils stabiliments vegni benedi da sur Bronislaw Krawiec.